IX ufre alcuerdos a la FSA alrodiu la TPA

IX pretende un alcuerdu lo más ampliu posible pal futuru de la radio y televisión pública con un consensu que tien de basase na neutralidá y en conteníos que representen la realidá d’Asturies y de la llingua asturiana.
Representantes del grupu parlamentariu d’IX caltuvieron esta mañana un alcuentru con miembros del grupu socialista pa falar dafechamente del futuru del Ente de la Radiotelesión del Principáu d’Asturies. L’oxetivu d’IX yera y ye, sigún asoleyaron esti día nun comunicáu, consiguir un alcuerdu, “lo más ampliu posible, de toles fuerces parlamentaries respective al futuru de la radio y televisión pública”.

Esi consensu tien de basase “na neutralidá y en conteníos que representen la realidá d’Asturies y de la llingua asturiana”, esplicó tres esti primer alcuentru Gaspar Llamazares, voceru parlamentariu d’IX. La coalición quier qu’haya “un consensu ente toles fuerces y non solo sía un asuntu de mayoríes cualificaes tanto la elección del conseyu d’alministración como’l nomamientu posterior del so director“. D’equí p’arriba, siguió Llamazares cola so esplicación, “va haber xuntes pa garantizar la pluralidá y la estabilidá de la radiotelevisión pública asturiana, que ye un elementu d’ocupación y esmolición de los grupos parlamentarios”.