AFA presenta na Escuela Comerciu de Xixón el so Cartafueyu Feminista

Esti martes, 16 de mayu, a les 19 hores, na 2ª planta de la Escuela de Comerciu de Xixón, AFA (Asociación Feminista d’Asturies) entama, cola collaboración col Atenéu Obreru de Xixón, una mesa redonda y la presentación del nº 18 del “Cartafueyu Feminista” sol títulu Maestres d’escuela: conocencia, trabayu, valor y pasión.

Intervienen delles de les sos autores: Carmen Suárez Suárez, Esperanza Fernández González y Ana María García García que van presentar esti númberu que ye una escoyeta (ampliada) de les ponencies presentaes nes Xornaes del mesmu nome celebraes a lo llargo de la seronda pasao y dedicaes a Luisa Riera Muñiz, Esperanza Rodríguez Cerdán, Antía Cal y les maestres de la escuela rural asturiana nel tardofranquismo.

Col ciclu de charres, agora recoyíes nesta publicación que les documenta, pretenden poner en valor, visibilizar y recuperar la memoria de maestres significatives pol so trabayu a favor de la igualdá, les llibertaes y la xusticia social al traviés del so exerciciu profesional y el so compromisu social dende la consciencia del poder tresformador de la educación, reconociendo’l méritu del so esfuerzu en momentos históricos que’l so contestu sociopolítico yera complexu y difícil.