David Guardado presentó “Nunca Vencida” en Xixón

El muséu Casa Natal de Xovellanos acoyía esti xueves 25 de Mayu la presentación del ensayu “Nunca Vencida” de David Guardado, cola participación de la prologuista de la edición, Pilar Sánchez Vicente, y el periodista Cristobal Ruitiña.

“Asturies, cuna d’España o baluarte de l’anti-España; semiente de la plurinacionalidá peninsular o xerme de la so unidá; pionera del llaicismu o abellugu del catolicismu… Nun ensayu valiente y revelador, David Guardado fai un repasu detalláu de les idees, los mitos y los discursos sobre Asturies qu’a lo llargo de la historia, dende la Edá Media hasta güei, compitieron por ser dominantes, amosando el so calter ideolóxicu”. Asina presenta la Editorial La Fabriquina l’ensayu de David Guardado que se presentaba esti xueves 25 de Mayu, coincidiendo con la fecha especial qu’abelluga la conseña que da titulu a una reflexón que quier averar al llector a la realidá de la identidá asturiano.

Dende una perspectiva inédita, la obra analiza cómo la interpretación de los símbolos y la historia d’Asturies (los astures, Pelayo, Cuadonga, la francesada, la bandera, la llingua asturiana o la Revolución d’Ochobre), “faen parte d’una batalla na que l’autor estrema dos xenealoxíes ideolóxiques opuestes: una mira al futuru y básase na afirmación de la singularidá asturiana, mientres que la otra mira al pasáu y constrúise dende la renuncia y la señardá”.