‘Xuegu de tronos’ desapiega en Barcelona

Desque’l pasáu xunetu anuncióse que Xuegu de tronos diba volver a percorrer el mundu al traviés d’una gran esposición interactiva, había espectación por conocer les ciudaes onde va recalar la xira internacional y paez que Barcelona va ser ún de los llugares.

Los únicos datos que s’avanzaron entós fueron que’l puntu de partida sería una ciudá europea y que la exhibición abriría les sos puertes na seronda. Los detalles del tour siguen siendo un secretu guardáu baxo siete llaves, pero según pudo saber La Vanguardia, con toa probabilidá va ser Barcelona la ciudá onde va arrincar la xira a finales del próximu ochobre, anque l’alcuerdu ente productores nun ta inda zarráu.

L’escenariu onde se van reproducir los reinos medievales de Westeros y Essos va ser les naves gótiques de les Drassanes Reials, onde s’alluga’l Museu Marítim.

Game of thrones: The touring exhibition ta inspirada na esitosa serie televisiva de fantasía medieval que’l pasáu mes d’agostu concluyó la so séptima temporada. Tratase d’una producción de la canal de televisión estadounidense HBO y GUES Events, empresa con una amplia esperiencia nel diseñu d’esposiciones interactivas basaes en películes de gran impactu en taquilla, como Harry Potter o Avatar. L’amuesa va ocupar cerca de 3.000 metros cuadraos y va recrear dellos espacios de Poniente, como Desembarco del Rei, la ciudá capital de los Siete Reinos y el so Tronu de Fierro, el Castiellu Negru de la Guardia de la Nueche y el Muriu o la tundra xelada más allá del Muriu onde habiten los Xavazs y los Caminantes Blancos. La esposición tamién va incluyir localizaciones fora de los Siete Reinos como la Casa de Blanco y Negru o la ciudá de Meereen. La exhibición va cuntar amás con pieces de vestuariu, accesorios y armes utilizaos polos personaxes de la serie.

Game of thrones: The touring exhibition nun ye la primer esposición que se realiza sobre la ficción creada por David Benioff y D.B. Weiss, a partir de les noveles de George R.R. Martin. Tou un fenómenu de mases que trespasa la pantalla. La primer amuesa itinerante sobre Xuegu de tronos debutó nel añu 2013 poco antes del estrenu de la tercer temporada y foi vista por centenar de miles de persones en tol mundu. L’amuesa desembarcó en Madrid, nel 2015, y pudo vese nel pabellón 16 de Mataderu, espaciu vencíu pol Conceyu madrilanu. España foi importante pa la serie, con rodaxes en Sevilla, Osuna, Girona, el parque natural de les Bárdenas Reales en Navarra, el castiellu de Peñíscola, Cáceres, Córdoba, San Juan de Gaztelugatxe, n’Euskadi o’l castiellu de Santa Florentina, en Canet de Mar.