Valdecarzana inaugura “Miraes pelegrines”

El Palaciu de Valdecarzana inaugura esta selmana “Miraes pelegrines”, una visión de la riqueza y diversidá del Camín de Santiago. La esposición, entamada per Correos, ta compuesta por 12 fotografíes realizaes por pelegrinos nos distintos itinerarios que componen la ruta xacobea.

El Palaciu de Valdecarzana acueye dende güei una nueva esposición. Sol títulu de Miraes pelegrines”, y entamada pola Sociedá Estatal Correos, amuesa la visión de la riqueza y diversidá del camín de Santiago al traviés de los güeyos de los y les caminantes. Va Permanecer n’exhibición hasta’l 18 de febreru.

Foi inaugurada esta mañana por Yolanda Alonso, conceyala de Cultura y Promoción de Ciudá d’Avilés, y José Ramón Menéndez, director de la Oficina de Correos d’Avilés, nuna nueva amuesa de la collaboración ente dambes entidaes, acabante clausurar la esposición d’Arte Postal d’Avilés.

“Miraes pelegrines” componse de 12 fotografíes tomaes nos distintos itinerarios que conformen la ruta xacobea, ufiertando al visitante la mirada de los y les pelegrines. Un puntu de vista caleidoscópico de la ruta y el pelegrinaxe, que reflexa tanto la riqueza como la diversidá natural, paisaxística, patrimonial y especialmente humana del Camín.

Nes instantánees que la conformen conflúin l’axuntadura de persones, redolaes, sentimientos y sensaciones que converten la realización del Camín de Santiago nuna vivencia inolvidable.

La esposición podrá visitase, de forma gratuita, hasta’l 18 de febreru, n’horariu de 11.00 a 14.00 y de 18.00 a 21.00 hores.

Más información