Una imaxe del asesín del embaxador rusu en Turquía gana’l World Press Photo

Una instantánea del asesín del embaxador rusu en Ankara, cola pistola entá na mano y el cuerpu del diplomáticu tendíu nel suelu en segundu planu, ganó güei el World Press Photo, el premiu más importante del fotoperiodismu internacional.

La imaxe “Un asesinatu en Turquía” ye obra del fotoperiodista turcu Burhan Ozbilici, que lleva 28 años trabayando pa l’axencia Associated Press. Foi tomada’l 19 d’avientu de 2016, cuando un policía antidisturbios que taba fuera de serviciu, Mevlüt Mert, acribilló a tiros al embaxador de Rusia en Turquía, Andréi Kárlov, nuna sala d’esposiciones de Ankara. “Felicito al fotoperiodista, tuvo enforma coraxe y fixo’l so trabayu de forma heroica”, dixo nuna conferencia de prensa’l presidente del concursu, Stuart Franklin. “Nun ye fácil imaxinate nuna situación asina ensin saber qué ta pasando, poniendo la to propia vida en riesgu. La serie de fotografíes que fixo ye impresionante”, añedió.

Ozbilici compareció emocionáu pol galardón y dixo que “tenía dos posibilidaes: quedame y faer el mio trabayu de periodista o salir corriendo”, pero que sintió “la responsabilidá de representar al periodismu”, polo que decidió siguir disparando col so cámara a pesar de que’l terrorista llegó a apuntar cola so arma escontra’l públicu. “L’home armáu asesinara a una persona inocente, pero decidí siguir faciendo’l mio trabayu”, dixo Ozbilici. “La mio fuerza interno, basada en valores humanos que toos compartimos, díxome que permaneciera de pies”, añedió.

El fotoperiodista dixo que nun emprestó atención a les palabres del terrorista, qu’en disparando al diplomáticu glayó “¡Alá ye grande! ¡Alá ye grande! ¡Nós morremos en Alepo, ustedes muerren equí!”, faciendo referencia a la intervención de Rusia na guerra de Siria.