Una esposición fotográfica recueye lo meyor de “Factoría Sound”

Una esposición fotográfica recueye dalgunos de los meyores momentos vivíos nel intre de los distintos conciertos que dieron forma al ciclu “Factoría Sound” d’Avilés demientres 2017.

La conceyala de Cultura, Yolanda Alonso, participó esti sábadu 7, a les 20:30 hores, na inauguración d’esta amuesa, nos minutos previos a l’actuación de la banda vizcaina Dead Broncu (21 hores).

L’amuesa ta formada por un total de 18 imaxes, tomaes y escoyíes por dos fotógrafos locales: José Antonio Fernández y Manuel G. Carranza. Según ésti últimu, les imaxes “traten d’amosar el perfectu maridaje ente soníos y semeyes, captando aquellos momentos que tán llamaos a perdurar muncho más tiempu del que la retina ye capaz de retener, momentos que trespasen el meru arte de la fotografía pa convertise en daqué vivu”.

L’amuesa va tar allugada nos baxos de la Factoría Cultural (Avenida de Portugal, 13), y podrá contemplase hasta’l 31 d’avientu, de llunes a vienres, n’horariu de 9 a 14:30 y de 16:30 a 21 hores, con entrada gratuita.