Samuel Armes va amosar nuna esposición la resultancia del trabayu realizáu cola ayuda a la creación de la FMC

Sol títulu “Sinestesia al relente” Samuel Armes va montar una esposición cola resultancia d’unu de los 7 proyectos artísticos de 2015 que llograron sofitu económicu de la Conceyalía de Cultura del Ayuntamientu d’Avilés pa la so execución. La obra va esponese na Factoría Cultural del 5 al 24 de mayu.

El restu d’iniciatives creatives desenvueltes dirán presentándose a lo llargo del añu y la conceyala de Cultura anuncia una nueva convocatoria p’anguaño, con calter nacional. La conceyala de Cultura, Yolanda Alonso, y l’artista local Samuel Armes presentaron la resultancia del trabayu pictóricu que l’avilesín executó nos últimos meses na Factoría Cultural, gracies a una de l’ayudes a la creación concedíes a finales del añu pasáu pola incubadora municipal de proyectos artísticos. Esta obra va poder contemplase nuna esposición que se va inaugurar el xueves 5 de mayu, a les 19:00 hores.

Armes, col so proyectu “Sinestesia al relente”, ye unu de los 7 artistes que llograron les primeres ayudes a la creación de la Fundación Municipal de Cultura, concedíes l’añu pasáu. Estes ayudes teníen como destino la realización de distintos proyectos artísticos y l’usu temporal del espaciu y de les infraestructures de la Factoría Cultural d’Avilés.

La conceyala de Cultura anunció qu’estes ayudes, que tán abiertes a diverses disciplines artístiques y plástiques, van tener continuidá anguaño y van convocase antes del branu. Como novedá, nesta ocasión van tar abiertes non yá a el ceadores asturianos, sinón a los de too l’ámbitu nacional. “Pensemos que sería bonu establecer sinergias y redes d’intercambiu con otros centros, con otres factoríes culturales y con otros artistes”, argumentó la edil.

Alonso destacó que “la nuesa pretensión ye convertir al Conceyu d’Avilés nun preséu catalizador ente el ceadores y la sociedá buscando y presentando formes alternatives d’espresión, de creación y de pensamientu que dexen impulsar l’arte y la creatividá, favoreciendo la industria cultural asturiana y la relación ente les distintes cañes de la cultura, faciendo posible el so acercamientu a la población”.

Les ayudes tienen como finalidá’l sofitu, la promoción y l’estímulu de la creación artística en base a los modelos del arte contemporaneo, almitiendo la multidisciplinariedá, potenciando’l so espardimientu y l’acercamientu a la ciudadanía y financiando a persones creadores y entamadores nacíes o empadronaes n’Asturies que promueven y lleven a cabo creaciones artístiques.

En 2015 convocáronse 7 ayudes, con una dotación económica de 2.000 euros caúna d’elles y partíes de la siguiente manera:

-2 ayudes a la producción y l’estudiu rellacionáu col arte plástico (pintores, escultores y ceramistes)

-2 ayudes a la producción y l’estudiu rellacionáu col arte gráfico (grabadores, ilustradores, fotógrafos y diseñadores gráficos)

-2 ayudes a la producción y l’estudiu rellacionáu col arte escénico (baillarinos, actores y músicos)

-1 ayuda a la producción y l’estudiu rellacionáu cola creación dixital y audiovisual (artistes plásticos, gráficos o escénicos que riquieren l’usu de les nueves tecnoloxíes na producción y nel estudiu de la so obra).