Pintures de seis muyeres artistes van sonar nel Muséu de Belles Artes

El presidente de la Fundación Municipal de Cultura, Jose Luis Costillas, presentó esta selmana’l Soníu del Arte, col que se da’l pistoletazu de salida a les actividaes de la séptima edición de SACU, la Selmana del Audiovisual Contemporaneu d’Uviéu.

El conceyal, que tuvo acompañáu por  Alfonso Palaciu, director del Muséu de Belles Artes d’Asturies, Pablo de María, director de SACU; David Machado, diseñador de soníu y Javier Patu, diseñador de soníu, esplicó qu’anguaño, esta propuesta, que aúna “pintura, soníu y cine”  va ufiertar la interpretación d’obres de seis pintores:  Kely, María Blanchard, Reyes Díaz, Maite Centol, Angelica Kauffman y Carolina del Castillo.   Los sos cuadros “van poder almirase dende güei nel Muséu de Belles Artes d’Asturies dende una perspectiva distinta, dende los güeyos de los que tán al otru llau de la pantalla, tres les cámares y tres les pantalles d’ordenador. Esta actividá que compon tol ecosistema de la selmana del cine d’Uviéu paezme, anguaño, más acertada que nunca, yá que tamién ye necesariu rindir un homenaxe a los técnicos que trabayen nel sector audiovisual, nel cine, la televisión, los conciertos, el teatru. Tamién ellos sufrieron y tán sufriendo esta crisis qu’afectó al texíu cultural y esta actividá ye una manera de dar a conocer el trabayu d’un diseñador de soníu, de los microfonistas, como ye’l casu de los dos artistes que realizaron estes creaciones, Javier Patu y David Machado. El so llabor y el so talentu queda munches vegaes clisáu pol de los actores y directores, y ensin ellos nun sería posible esfrutar del cine como lu faemos” resaltó’l conceyal de Cultura.

Pela so parte, el responsable de SACU, Pablo de María, esplicó cómo los visitantes del Muséu de Belles Artes van poder esfrutar d’esta propuesta cultural na que gracies al trabayu d’estos técnicos de soníu vamos poder afayar, hasta’l 9 de mayu, cómo suenen 6 cuadros de la pinacoteca. Al igual que l’añu pasáu tan solo va ser necesariu lleer un códigu QR asitiáu al llau de cada obra.

El director del Muséu de Belles Artes felicitóse por convertir la pinacoteca n’escenariu d’actividaes  d’esta nueva edición de SACU, yá que comparten la so filosofía de “tender pontes ente distintes artes: como la pintura, la música y por estensión el cine”

La selección de la tercer edición d’El soníu del arte inclúi les siguientes obres: Ensin títulu, de Kely; Semeya de moza, de María Blanchard; Branu pela tarde, de Reyes Díaz; Ensin títulu, de Maite Centol; San José col Neñu, de Angelica Kauffmann, y Camín del Llosón (Jove), de Carolina del Castillo.

Más información