Portada Comunicación Periodistes pol asturianu elabora una propuesta sobre la llingua nel Ente

Periodistes pol asturianu elabora una propuesta sobre la llingua nel Ente

by asturnet

Periodistes pol asturianu, el colectivu que xunta a profesionales y colaboradores de medios de comunicación enfotaos na defensa de los derechos llingüísticos, acaba d’elaborar una propuesta sobre la presencia de la llingua asturiana nel Ente Públicu de Comunicación del Principáu. La plataforma va reunise lluego con representantes políticos y de la radiotelevisión autonómica pa espone-yos la so propuesta na que se defende una presencia digna del asturianu na radio, televisión y portal dixital del mediu públicu, asina como’l papel qu’había xugar l’Ente na normalización de la llingua.

Periodistes pol Asturianu va entamar una rueda d’entrevistes con representates políticos y responsables del Ente Públicu de Comunicación cola fin de presenta-yos la so propuesta sobre la presencia de la llingua asturiana na canal autonómica. El colectivu de profesionales y colaboradores de medios, ta acabante d’ellaborar un documentu, nel que s’espón la necesidá de que l’asturianu tenga una presencia digna na televisión, na radio y el mediu dixital que se prevé qu’eche a andar nel mes de setiembre.Nel documentu, abórdense cuestiones como la capacidá de normalización llingüística de los medios audiovisuales, indicando que nun se pue desaprovechar la oportunidá que brinda l’Ente Públicu de Comunicación pa la promoción de la llingua asturiana.

Un de los asuntos trataos nel documentu ye la importancia del doblaxe, sobremanera no que cinca a la programación infantil. Periodistes pol Asturianu considera que’l trabayu nesta llinia tien una doble virtualidá: dar cobertura a una estaya fundamental de cara a la normalización, al par que se fai un apueste pola industria propia, tanto de cara a productores audiovisuales como profesionales del arte dramáticu. Amás, l’informe recueye tola lexislación na que se dicten los derechos y los deberes qu’amparen a les llingües minorizaes, que nel casu del asturianu van dende l’Estatutu d’Autonomía a la Carta Europea de les Llingües Minorizaes. Siguiendo la lletra del corpus xurídicu, interprétase que l’asturianu, en cuantes que llingua minorizada, ha tener reconocíos los mesmos derechos que’l restu d’idiomes, tal como encamienta la Unesco, siendo l’Ente Públicu de Comunicación un vehículu afayadizu pa facelos efectivos.

Nel testu faise un repasu históricu pola presencia del asturianu nos medios de comunicación, amuesando que nun se ta proponiendo dalgo estraño, sinón que foi y ye una realidá, caltenida sobre manera pol esfuerciu personal y colectivu de bien de grupos preocupaos pola llingua propia. Al par, tamién s’examina con procuru la presencia actual del asturianu nos medios de comunicación con difusión n’Asturies, poniendo de manifiestu que la mayor parte de les veces faise de manera puntual y mentes dure la subvención concedida pola Conseyería de Cultura. Igualmente, recuéyense les experiencies de televisiones autonómiques en territorios con llingua propia, tanto nel estáu español como na Unión Europea. ETB 1, la Corporació Catalana de Ràdio i Televisió, la Televisión de Galicia o Punt Dos en Valencia espeyen cómo la normalización de la llingua propia ye ún de los principales oxetivos colos que nacen estes canales. N’Europa, repítese’l fenómenu de garantizar les necesidaes informatives a comunidaes de falantes de llingües minorizaes: el País Galés, Irlanda, Escocia, Holanda, Alemaña, Bélxica, Dinamarca, Finlandia, Noruega, Francia, Grecia y Italia son dalgunos de los casos que se citen.A traviés de too ello, Periodistes pol Asturianu quier recordar a representantes políticos y responsables del Ente Públicu de Comunicación la necesidá de qu’ésti nun dexe pasar una de les cuestiones qu’habíen de ser básiques na puesta en marcha del mesmu: la normalización del asturianu.

Tamién te podria gustar