Migoya respuende a IX que’l Gobiernu nun va mudar el so procedimientu pa la reforma l’Estatutu

El Gobiernu asturianu respondió ayer a la propuesta d’Izquierda Xunida sobre la reforma del Estatutu y la comenencia d’algamar un alcuerdu previu ente los partíos integraos nel executivu enantes de la so discusión na Xunta Xeneral. Al través de la so portavoz, la conseyera Ana Rosa Migoya, el gobiernu que preside Vicente Álvarez Areces, refugó la posibilidá de pactar el borrador de la reforma ente PSOE y IX-Bloque enantes de llevalo al parlamentu y afirmó que l’executivu autonómicu “nun va mudar nin el calendariu nin el procedimientu” pal nuevu Estatutu.

La portavoz del gobiernu del Principáu fexo esta afirmación acabante’l Conseyu de los xueves, na rueda informativa na que dio cuenta de los alcuerdos adptaos pol executivu na so reunión. Contestaba asina a la propuesta llanzada ayer pol coordinador d’Izquierda Xunida d’Asturies, Jesús Iglesias pa que les llinies básiques del borrador de la reforma estatutaria fueran consensuaes ente los partíos integrantes del tripartitu asturianu enantes de llevalo al parlamentu autonómicu. Na so propuesta Iglesias punxo como modelu a siguir el nuevu estatutu de la Comunidá Valenciana, sobremanera nos puntos onde había una mayor dixebra ente PSOE ya IX-BA, como la oficialidá del asturianu o la declaración d’Asturies como nacionalidá hestórica.

Ana Rosa Migoya apuntó a que’l gobiernu va disponer bien lluego de los informes encargaos a la comisión d’espertos sobre la reforma del estatutu y que ser d’esi momentu pa en delantre cuando entame’l procesu de consultes coles fuerces polítiques representaes nel parlamentu col oxetivu d’algamar, lo que calificó de “ un documentu óptimu”. Esi borrador de mínimos diba ser sobre’l que había desenvolvese el debate na Xunta Xeneral.

Per otru llau, la mesa de la Xunta Xeneral, a pitición del grupu popular, reprobó a la conseyera de Cultura y Comunicación pol so retardu n’apurrir al parlamentu tola información sobre l’Ente Públicu de Comunicación. El diputáu del PP Fernando Goñi calificó l’actitú del gobiernu de “falta de respetu” al so grupu y “oscurantistu por ocultar información que’l nuestru grupu lleva demandando dende que se punxeron en marcha los trámites pa la creación de la televisión autonómica”.