Olivia Rodrigo lidera les nominaciones a los American Music Awards

La cantante estadounidense Olivia Rodrigo, de 18 años, destacó la selmana pasada nel anunciu de les nominaciones a los premios American Music Awards al consiguir siete candidatures pal so debú discográficu, per delantre de los seis de The Weeknd y los cinco de Doja Cat, Bad Bunny y Giveon.

El puertorriqueñu Bad Bunny, pela so parte, lidera ente los llatinos con cinco candidatures a los galardones que, rindíos a la popularidá de la música n’español, ampliaron les categoríes llatines hasta un total de cinco.

Los American Music Awards (embrivíos como Ames) sirven como antoxana de los prestixosos Grammy, anque cola diferencia de que se determinen por una encuesta popular dirixida a consumidores de música, en llugar de votase polos espertos de la industria. Pa escoyer a los candidatos ente los que’l públicu puede votar, el organizadores suman les vientes de discos, reproducciones n’internet y popularidá de los artistes.

Los premios apurriránlos el 21 de payares nuna ceremonia que va volver al formatu presencial nel Microsoft Theater de Los Ánxeles (EEXX).

Na categoría reina, artista del añu, van competir Ariana Grande, BTS, Drake, Taylor Swift, The Weeknd y Olivia Rodrigo. Rodrigo ye candidata tamién al premiu al meyor nuevu artista, una y bones la cantante esperimentó una crecedera de popularidá meteóricu nel últimu añu gracies al fenómenu viral del so cantar ‘Drivers License’ y un primer discu debú, ‘Sour’, que la prensa musical compara col debú de Alanis Morissette.

Ello ye que los AMES inauguren anguaño xuna categoría que va premiar al cantar más viral en redes sociales como TikTok, y na qu’amás de Rodrigo figura los italianos Måneskin (ganadores del Festival d’Eurovisión), Megan Thee Stallion, Erica Banks y Popp Hunna.

Bad Bunny, J Balvin, Maluma, Ozuna y Rauw Alejandro apostaránse’l premiu al meyor artista masculín; ente que Becky G, Kali Uchis, Karol G, Natti Natasha y Rosalía van faer lo mesmo na categoría femenina.