Los soníos de los sesenta regresen a Asturies na décima edición del festival Euroyeyé

Patilles, gafes de pasta y flequillos curtios. El festival Euroyeyé de Xixón atrái hasta’l llunes a cientos de siguidores de la música de los años sesenta, que nesta edición podrán asistir a conciertos de P.P. Arnold, Teenagers, Furdelux, Fortune Tellers, Mastica, Diplomats of Solid Sound y Canary Sect. El certame, que cellebra’l so décimu aniversariu, espárdese poles sales Oasis y Parque’l Piles.

Nesti segundu recintu tendrá llugar a partir de les 22 hores de güei, vienres, l’actuación de la norteamericana P.P. Arnold -que trabayó xunta artistes como Rod Stewart, Tina Turner y Mick Jagger-, teloneada pola banda española de soul The Teenagers. De sutaque, abriráse una sesión de música ‘allnighter’ que tendrá continuidá el sábadu, na sala Oasis, con una sesión asemeyada tres del conciertu de les bandes Furdelux y Fortune Tellers.

El domingu, los protagonistes del festival sedrán los norteamericanos The Diplomats of Solid Sound y los italianos Mastica, que-y pondrán música a una nueche, na sala Parque’l Piles, na que va escoyese a ‘miss y míster Yeyé’. El fin de fiesta pondrálu a partir de les 21 hores del llunes el grupu Canary Sect, qu’actuará de baldre nel Espigón de Fomentu antes de la folixa de despidida’l festival, en Cimavilla.

Sacante esti últimu recital, les entraes p’acceder a tolos conciertos véndense a un preciu d’ente 12 y 15 euros, qu’incluyen les sesiones de dj previstes darréu de cada recital y lideraes por una llarga llista de pinchadiscos especializaos en música ‘retro’ ente los que s’alcuentren Rob Bailey, Jason Ringgold, Eduard Domingo, Pilar Hergueta y Ángel Brocos.