Les XXII Xornaes del Cómic d’Avilés calecen motores con una esposición n’El Atriu

Del 1 al 16 de setiembre les XXII Xornaes del Cómic d’Avilés calecen motores con una esposición n’El Atriu compuesta por una trentena d’orixinales de la novela gráfica “Mary Shelley: la muerte de la bisarma”, obra de Raquel Llagartos y Julio César Iglesias.

Les XXII Xornaes Internacionales del Cómic d’Avilés, que se van celebrar del 12 al 16 de setiembre, empecipiaron esti vienres pasáu, día primeru del mes, el so programa d’actividaes. Facíase cola inauguración d’una esposición compuesta por una trentena d’orixinales de la novela gráfica “Mary Shelley: la muerte de la bisarma”, obra de Raquel Llagartos y Julio César Iglesias.

Editada por Diábolo Ediciones, esta novela gráfica ye un acercamientu a la ceadora del personaxe de Frankenstein, que dende’l so llanzamientu llogró una escelente acoyida per parte de el llectores. L’amuesa va permanecer nel Centru Comercial L’Atriu hasta’l 16 de setiembre, día en que van quedar clausuraes les XXII Xornaes Internacionales del Cómic d’Avilés.

Raquel Llagartos ye ilustradora y artista de cómic afincada n’Asturies. Formada n’ilustración pola Escuela d’Arte d’Uviéu y llicenciada en Matemátiques, collaboró con diverses publicaciones ya instituciones, amás de participar en delles esposiciones colectives de ilustradores asturianos. Prefier trabayar con medios tradicionales, principalmente tinta y acuarela, y les sos temes orbitan en redol al estudiu emocional de los personaxes y les atmósferes que los arrodien.

Julio César Iglesias ye llicenciáu n’Hestoria, doctoráu n’Hestoria Contemporanea con una tesis sobro representaciones culturales de Xapón. Collaboró en diversos medios dedicaos a la lliteratura y a la narración gráfica, como Zona Negativa, Cuadiernos del Cómic o Revista Exéxesis. Escribe sobro analís narrativu, cómic y lliteratura nel blogue Nueve Párrafos.

Hasta’l momentu, la organización de les XXII Xornaes Internacionales del Cómic d’Avilés confirmó la participación de dibuxantes y guionistes de sonadía internacional como Larry Hama, Pablo Auladell, Antonio Altarriba, Keko, Oriol Hernández, Rafa Vaquer, Jaime Martín, James Robinson, José Carbayeda, Marcial Toledanu, Víctor Ibáñez, Luis Bustos, I. N. J. Culbard, Marcello Quintanilha, Antonio Altarriba, Yildiray Cinar, Alberto Ponticelli y Javier Fernández.