L’artista cacereñu “San” va realizar el mural de la plaza de los Oficios d’Avilés

L’artista cacereñu Daniel Muñoz “San” va ser l’encargáu de llevar a cabu la intervención artística convocada pol Conceyu d’Avilés pa la fachada del edificiu 50 de la cai Llanu Ponte, na plaza de Los Oficios, sigún decidiera esti llunes el xuráu aconceyáu pa ello.

Daniel Muñoz va executar la so intervención artística n’Avilés n’ochobre. Ye críticu col arte urbano qu’invade l’espaciu visual de los habitantes ensin tener en cuenta nin la so opinión nin el so ritmu de vida. Apasionáu del dibuxu, asegura que nun hai “nada comparable al resfregón inmediatu colo real” que supon crear n’espacios públicos.

Ye un apasionáu del dibuxu como “un mediu bien poderosu col qu’establecer relaciones ente ún mesmu y la realidá”. Y practicar na cai: “dibuxar n’espacios públicos ye, primero de too, trabayar colo presistente, actuando directamente sobro los materiales que delimitan l’espaciu qu’arrodia’l nuesu aportar. Nada comparable al resfregón inmediatu colo real”, defende.

El conceyal de Promoción de Ciudá, Manuel Riola, esplicó que la propuesta creativa de San pal so mural d’Avilés “parte de la puesta de mancomún del imaxinariu colectivu a partir d’imaxes personales qu’apurra la ciudadanía y coles que va componer el mural y va formar xuna imaxe colectiva. Pretende implicar al mayor númberu de persones posible. San ye críticu colos eventos d’arte urbano no que s’invade l’espaciu visual de los habitantes d’una zona ensin tener en cuenta nin la so opinión nin el so ritmu de vida”.

Daniel Muñoz cunta con murales n’espacios públicos de 12 países: Bayamón y San Juan (Puertu Ricu), Atlanta (Estaos Xuníos), Gdansk (Polonia), Bangkok (Tailandia), Perugia (Italia), Toulousse, París, Besançon y Estrasburgo (Francia), Tánger (Marruecos), Londres y Manchester (Reinu Uníu), Ríu de Janeiro (Brasil), Dublín (Irlanda), Moscú (Rusia) y Wiesbaden (Alemaña). Y en 17 localidaes españoles: Bilbao, Santander, Torreblanca, Barcelona, Blanca, Llión, Miajadas, Zaragoza, Córdoba, Cáceres, Madrid, Eivissa, Valencia, Les Palmes de Gran Canaria, Sevilla, Cádiz y Alicante. Suma amás una docena d’esposiciones individuales en Cáceres, Fuenlabrada, San Francisco (Estaos Xuníos), La Rochell (Francia), Niort (Francia), Sevilla, Milán (Italia), Barcelona, Xordania y Los Ánxeles (Estaos Xuníos).