L’Amuesa d’Artes Plástiques del Principáu d’Asturies abre les sos puertes

Vuelve l’Amuesa d’Artes Plástiques del Principáu d’Asturies a Xixón y a la Sala 1 del Centru Cultira Antiguu Institutu nesti mes de xunu ufriendo una bona oportunidá p’aportar a les propuestes artístiques más nueves.

Del 14 de xunu al 15 de xunetu de 2018.

Comisariu: Luis Feás

Esposición de la obra de les artistes escoyíos na presente edición de l’Amuesa d’Artes Plástiques del Principáu d’Asturies, el más importante sofitu con que cunten los artistes menores de trenta y cinco años venceyaos a la nuesa Comunidá Autónoma. Componen la 28 edición de l’Amuesa les obres de Miguel Braceli #Premio Asturies Nueva d’Artes Plástiques y los escoyíos Tania Blanco, Cuadonga Casáu, Mariana Heredia, Noemí Iglesias Rodrigo Martín y Mario M. Martínez Peláez.

Resulta complicao atopar un denominador común que dea unidá y sentíu a una esposición tan diversa como ésta, anque podría aventurase una respuesta: n’arte too ye xestu, maneres, filosofía interpuesta, y eso ye daqué no que tolos artistes equí aconceyaos, cuatro muyeres y trés homes, concuerden. Pero ye qu’amás eso se tresllada a la so obra, que ye un compendiu de práctiques rellacionaes colo performativo y traduzse nuna estensión de los cuerpos, propios y ayenos, a los que se cartografía, trazando en carne y güesu les sos coordenaes geopolíticas.