La Xunta de Gobiernu del Conceyu d’Uviéu aprueba abrir el Conseyu Municipal d’Igualdá a toles asociaciones feministes

La Xunta de Gobiernu del Conceyu d’Uviéu aprobó esta mañana’l cambéu del Reglamentu del Conseyu Municipal d’Igualdá, p’asegurar la participación a toles asociaciones feministes que la deseyen, siempres y cuando tengan como unu de los sos oxetivos la llucha pola igualdá.

La conceyala responsable de l’área, Marisa Ponga, aseguró que, con estos cambeos, va consiguise “un conseyu real”, llueñe del actual, bien “restrictivu y en que los sos oxetivos paez que da mieu falar d’igualdá real” yá que nél tan solo taben representaes cinco asociaciones escoyíes por sortéu.

La conceyala sorrayó que colos cambeos nel reglamentu, va esaniciase esta llende pa les asociaciones, que namái tendrán de cumplir el requisitu de qu’ente los sos oxetivos figure la llucha pola igualdá. Nel futuru Conseyu va dase voz tamién a los sindicatos con más representatividá y a colectivos LGTB qu’enceten les dificultaes de les muyeres d’estos colectivos.

Ponga anunció, que la primera propuesta que la so conceyalía va presentar nel Conseyu va ser la ellaboración d’un nuevu Plan d’Igualdá, teniendo en cuenta que’l postreru caducó nel añu 2012, y nel que se va dar respuesta a problemátiques de la sociedá actual, como los  micromachismos según la prevención de la violencia na población más nueva. El Plan, va incorporar midíes concretes pa trabayar  colos colectivos de muyeres más vulnerables, como inmigrantes, minoríes étniques y víctimes violencia machista.