Portada Conceyos Lluz verde a la convocatoria de subvenciones pa congresos feries y eventos en Xixón

Lluz verde a la convocatoria de subvenciones pa congresos feries y eventos en Xixón

by redacción asturnews

La Xunta de Gobiernu del Conceyu de Xixón aprobó na so cabera xunta del mes pasáu la convocatoria de subvenciones pa la organización de congresos, convenciones, feries y eventos en Xixón ente’l 1 de xineru y el 31 d’avientu de 2023.

Cunta con una partida de 50.000 euros que la so finalidá ye que se celebren nel conceyu alcuentros rexonales ( considérense aquellos alcuentros nos que siquier el 60% del total de participantes son d’Asturies), nacionales (40% de les persones participantes presencialmente provienen de fora d’Asturies) y/o internacionales (el 40% de participantes presenciales provienen de fora del país y representen siquier a 3 países distintos, o’l 90% de los y les participantes presenciales vienen del estranxeru anque nun venir de 3 países distintos) con see permanente o vocación de permanencia y d’ámbitu rexonal y réxime rotatoriu.

Nesi sentíu, les xuntes van poder ser en formatu híbridu, pero’l so ámbitu (internacional, nacional y/o rexonal) va venir determináu namá pola procedencia de los participantes presenciales pa la valoración. El númberu total d’inscritos (presenciales y online) solo va tenese en cuenta na valoración cualitativa del algame, esto ye, de la proyección de la xunta.

La cuantía prevista pa les xuntes o eventos que se celebren nel primer semestre del añu va ser de 20.000 euros; pa los que se celebren nel segundu semestre del añu va ser de 30.000 euros. Nel casu d’entepasar nel primer plazu de 2023, va amontase la cuantía del segundu.

Van Poder beneficiase aquelles organizaciones que cunten coles dotaciones fayadices pa garantizar la correcta execución del eventu, promoviendo’l mayor impactu posible y la cooperación en medios y recursos económicos con otres entidaes y empreses pal so desenvolvimientu.

La Xunta de Gobiernu tamién aprobó la convocatoria y bases específiques reguladores de los incentivos pa les árees empresariales públiques del conceyu por importe de 85.000 euros.

Más información

 

Tamién te podria gustar