La recaldación del cine español nel esterior cayó un 14 %

La recaldación del cine español nel esterior cayó un 14,1 % l’añu pasáu, hasta los 160 millones d’euros, y el númberu de películes distribuyíes fora de les nueses fronteres tamién baxó un 16 % hasta 132, según datos presentaos esti xueves pola confederación de productores audiovisuales FAPAE.

El so presidente, Ramón Colom, relativizó la negatividad d’esos datos, incluyíos nel informe “El cine español nel mercáu internacional 2015”, al recordar que les cifres doblen les rexistraes va diez años, tantu en recaldación como en númberu de llargumetraxes distribuyíos.

Mientres l’actu, encuadráu na décima edición de Spanish Screenings, eventu destináu a promocionar y esportar el cine español, apurrióse tamién el premiu a la película con mayor repercusión internacional en 2015 a “La isla mínima”, con más de 12 millones d’euros recaldaos y dos millones d’espectadores, un galardón que recoyó’l so productor José Antonio Félez.

Dende’l puntu de vista de la producción, según l’informe, España xubió un puestu al respective de 2014 y asitióse como’l séptimu país con más películes producíes nel mundu (254) y el segundu d’Europa. El xéneru más distribuyíu a nivel internacional en 2015 foi de nuevu’l drama (31,8 %), siguíu de la comedia (20,4 %), el thriller (16 %), el documental (11,4 %), l’animación (7,2 %), el terror (6,8 %) y otros xéneros (6,4%).