Marta Mori renuncia a la vicepresidencia de l’Academia de la Lingua Asturiana

L’académica Marta Mori comunicó’l pasáu 2 de marzu el so determín de renunciar a la vicepresidencia de la institución llingüística, darréu de la so aceutación como candidata a conceyala en Xixón.

Marta Mori considera que nestos momentos, dende’l puntu de vista personal, ye más importante’l so compromisu social y políticu que la so contribución a la xestión académica. Arriendes d’ello, tamién tien en cuenta la necesaria visualización de la neutralidá política que, en tou momentu, tien d’amosar l’Academia. L’Academia de la Llingua Asturiana treslladaba a Marta Mori, nuna nota de prensa espublizada esta selmana, so respetu por una decisión qu’entiende dafechu y, en tou casu, va siguir cuntando coles sos valibles aportaciones como académica de númberu.

La coalición Izquierda Xunida – Más País Asturies incorporaba esti mes a la escritora y profesora xixonesa Marta Mori de riba a la so candidatura municipal en Xixón. Trátase, en palabres del candidatu a l’Alcaldía, Javier Suárez Llana, de “un pasu más nel apueste d’apertura a la ciudá que tamos faciendo pa construyir el proyectu de futuru que queremos para Xixón. Sumar con Marta ye sumar cola nuesa cultura y cola nuesa llingua, y ye sumar cola educación pública. Qu’una persona col prestíu y la trayectoria de Marta forme parte d’esti proyectu ye un motivu d’allegría y d’agradecimientu”.

Marta Mori, que va ocupar un puestu ente los dolce primeros de la llista, amuésase “mui enfotada nel proyectu qu’IX-Más País ta preparando pa la ciudá. Les polítiques municipales xixoneses tienen qu’actualizase p’averase a los retos que nos ta plantegando’l sieglu XXI: equidá educativa, breches dixital y de xéneru, urbanismu y economía sostenibles, integración de la población inmigrante, atención en salú mental y potenciación del accesu a la cultura y el deporte, sobre too de la infancia y la mocedá…”.

Nacida en Xixón en 1965, Mori ye vecina del barriu de Laviada. Doctora en Filoloxía Española pola Universidá d’Uviéu, anguaño trabaya como profesora nel IES Xovellanos y da clases como profesora acomuñada na Facultá d’Educación de la Universidá d’Uviéu. Miembru de númberu de l’Academia de la Llingua Asturiana, de la que ye vicepresidenta, dirixe dende va años la revista Lliteratura, creada a empiezos de los años 90 pol tamién poeta Xosé Bolado. Ente los años 2019 y 2022, foi amás presidenta de la Xunta de Personal Docente non Universitariu d’Asturies, desempeñando’l cargu en representación de la Federación d’Enseñanza de CCOO. Na actualidá forma parte de la Executiva de la Unión Comarcal de CCOO de Xixón.

Na so faceta d’escritora, tien publicaos numberosos poemarios colos que llogró premios y reconocencies como’l Teodoro Cuesta de Poesía nos años 2002 y 2004 con Pórticu y El tiempu de la espera, o’l Xuan María Acebal de Poesía nos años 2010 y 2022 con L’alcordanza. La mio voz y Los carreros del tiempu. Ye autora tamién del llibru de relatos Histories familiares, de la traducción al asturianu d’El cementariu marín, de Paul Valéry, o del volume d’ensayos Notes de lliteratura asturiana, amás d’artículos d’opinión y de crítica lliteraria y de publicaciones educatives nel ámbitu de la investigación o los llibros de testu.

Agora, cola so incorporación a la candidatura d’IX-Más País Asturies, la escritora márcase como reto que l’asturianu forme parte “de la puesta’l día de les polítiques culturales en Xixón. Hai que romper cola mentalidá subsidiaria, qu’implica la organización d’acciones que siempres se consideren complementaries. La promoción real del asturianu, poniéndolu al par del castellanu en tolos ámbitos, ye la única forma de caltener el patrimoniu cultural, pero tamién ye una manera d’activar económicamente la ciudá a traviés de la creación d’una industria cultural y turístico específica, de la que yá hai exemplos con resultáivos mui bonos”.