La Selmana Santa d’Uviéu 2023 cuenta yá con cartelu oficial

El Salón de Plenos del Conceyu acoyó esta selmana pasada la presentación del cartelu oficial de la Selmana Santa, ganador del Concursu entamáu pola Xunta d’Hermandaes y Confreríes de Selmana Santa d’Uviéu, qu’anguaño robla l’ayerán Oscar González García.

Luis García Pevida, presidente de la entidá organizadora del certame, estimó la collaboración de tolos participantes, pola gran calidá de les propuestes presentaes nesta edición”. Pela so parte, el conceyal de Turismu, Alfredo García Quintana, felicitó a la Xunta d’Hermandaes y Confreríes d’Uviéu “pol trabayu que vien realizando nos últimos años” y comprometió el sofitu municipal “dientro de les nueses posiblidades, para siguir impulsando esta cita tan importante dende’l puntu de vista turísticu para la nuesa ciudá. Esperamos que vuelva ser un ésitu como nos últimos años y que los visitantes aprovechen, amás de participar nes procesiones, a conocer los recursos de la nuesa ciudá; el nuesu patrimoniu, cultura y gastronomía”.

Tamién amosó’l so sofitu a la Selmana Santa d’Uviéu, el presidente de la xunta local de Otea , David González Codón, “porque ye una dómina perimportante para cualquier ciudá, yo creo que yera, nel so momentu, una asignatura pindia n’Uviéu porque paez que la mirábamos como con verguenza, embrivir”. González Codón sorrayó’l trabayu municipal impulsando’l eslogan “Uviéu, Orixe del Camín” yá que el turismu relixosu atrai a munches persones a la nuesa ciudá”.
El xuráu, compuestu pol director del Muséu de Belles Artes d’Asturies, Alfonso Palaciu, los artistes Faustino Ruiz de la Peña y Manuel García Llinares, el conceyal Alfredo García Quintana y el presidente de l’Asociación Profesional de Fotoperiodistes d’Asturies, Fernando Carbayos, falló por unanimidá’l 16 de xineru escoyer, como obra ganadora la presentada pol ayerán Oscar González García quien yá consiguiera los primeros puestos nes ediciones del certame nos años 2009, 2010 y 2012.

El presidente de la Xunta d’Hermandaes y Confreríes de la Selmana Santa d’Uviéu cerró la rueda de prensa anunciando los actos entamaos pa la cuaresma:

• 24 de febreru: Via Crucis poles cais d’Uviéu. Salida de la Ilesia parroquial de San Isidoro el Real a les 20:00 hores
• 21 de marzu: Pregón de Selmana Santa al cargu de Don Luis Germán Aviles na Ilesia parroquial de Santiso’l Real (20:00 hores)
• Del 27 de marzu al 1 d’abril. Esposición del patrimoniu de les Confreríes pertenecientes a la Xunta. L’horariu va ser dende’l martes 28 de marzu a vienres 31 de marzu de 11 a 14 y de 17 a 20 hores. El sábadu, 1 d’abril, de 11 a les 14 hores.