Portada Plástiques La obra de Goyeneche habita nel Muséu Antón

La obra de Goyeneche habita nel Muséu Antón

by redacción asturnews

El Muséu Antón de Candás inauguraba esta selmana la esposición “L’espaciu habitáu”, con obres de l’artista cántabra Arancha Goyeneche. Hasta’l 6 de payares va tar abierta al públicu l’amuesa, comisariada polcríticu Santiago Martínez, que presenta una selección d’obres ya instalaciones representatives de la producción de Goyeneche.

De les obres de Goyeneche (Santander, 1967) espuestes nel Muséu Antón, Santiago Martínez destaca que son “frutu d’un trabayu técnicu rigorosu”, “basáu n’una xeometría estazada, nel cromatismu y nos efectos llumínicos” y que “habiten los espacios, tresformándolos”.

La obra de Goyeneche foi evolucionando, según Martínez, “dende la pintura, escontra ámbitos de la instalación artística y la escultura, con obres que non solo son reflexu de la so propia evolución y sensibilidá como creadora, tamién lo son de la realidá plástica contemporanea”.

Arancha Goyeneche tien una llarga y sobresaliente trayectoria artística. En 2020 ganó’l Premiu d’Artes Plástiques del Gobiernu de Cantabria. Ye llicenciada en Belles Artes y la so actividá artística empecipiar nos años noventa. Dende entós participó en delles feries d’arte contemporaneo, realizó numberoses esposiciones individuales, como les de la galería Siboney (Santander), la galería Set Spai d’Art (Valencia), Xema Llamazares (Xixón), l’Espaciu Marzana (Bilbao), Canem (Castellón) y Max Estrella (Madrid).

La obra de Arancha Goyeneche entró nos llibros sobro arte, mentada y reproducida en testos de referencia sobro la pintura española contemporanea, como “El sistema del arte n’España” y el manual “Arte español contemporaneu”, publicáu en 2013.

Tamién te podria gustar