La Escuela de Música Tradicional del Conceyu presenta’l discu ‘Tazones. Con, dende…nel corazón’

La conceyala d’Educación, Merced González, presentó esta selmana l’últimu discu de la colección de trabayos del Centru de documentación de la Escuela de Música Tradicional ‘Manolo Quirós’, dependiente del Conceyu d’Uviéu.

González tuvo acompañada nesta presentación pol director de la Escuela, José Manuel Fdez. ‘Guti’y pol profesor d’Investigación Folclórica, Fernando de la Ponte. La presentación sirvió amás como homenaxe póstumu a l’autora del discu, Eva Cabal, alumna de la Escuela finada en 2013 a los 25 d’años. Familiares, amigos y vecinos de Tazones siguieron emocionaos na sala de prensa del Conceyu la presentación.

La conceyala esplicó qu’esti nuevu discu ye “un percorríu pol folclore musical encontáu nel cantar que se desenvolvió na villa de Tazones, tomando como base trabayos de campu realizaos nesa villa pola autora”. González manifestó la so allegría por tener la oportunidá de presentar el trabayu y dirixióse a los padres de la finada pa tresllada-yos el so pésame pola muerte de la nueva, pero tamién la so felicitación pol llabor realizada pola so fía.
Pela so parte, ‘Guti’ reconoció que se trataba d’un día murniu” pola ausencia d’una alumna “que se faía querer”.

El profesor Fernando de la Ponte sorrayó l’amor d’Eva Cabal “a la tradición” y a la villa marinera de Tazones y allabó el trabayu d’investigación lleváu a cabu pola autora y que se compila nesti discu, que recupera grabaciones analóxiques del folclore de Tazones.