La delegación asturiana sal esti xueves pa Lorient

La delegación asturiana que participa nel Festival Intercélticu de Lorient, con bandes como Ciquitrinos, les pandereteres de Dulcamara, Escontra y les bandes de gaites de Corvera y La Reina del Truébano como representantes, va colar esti xueves pela nueche pa Bretaña, cola delegada Fé Santoveña como cabezalera, nos autobuses de la organización ente xaréu y música. La delegación va salir de la Plaza la Xesta d’Uviéu como ye tradicional a les 10 de la nueche y aportar a Lorient pa xintar y disfrutar de les primeres actuaciones del festival.

El primer día del Festival Intercélticu de Lorient arranca davezu con una completa xornada na que se van poer degustar los más típicos pexes de la Bretaña, mentantu actúen delles de les bandes qu’esti añu amenicen la selmana. A les 20.00 hores, en Port de Páche, dase’l pistoletazu al Festival 2008 con una xinta popular xunta la mar y a partir de les 22 hores nel Espace Marine, podrá disfrutase de los Celtas Cortos.

El Festival Intercélticu de Lorient cellebra esti añu, del 1 al 10 d’agostu, la edición númberu 38 con una importante representación asturiana de la mano de bandes como Ciquitrinos, les pandereteres de Dulcamara, Escontra y les bandes de gaites de Corvera y La Reina del Truébano. Amás el festival que dirixe Lisandro Lombardía va cuntar cola presencia de nomes consagraos de la musica celta como Lorena Mc Kennit, Moving Hearts o The Chieftains o grupos averaos a la escena como Celtas Cortos, Idir o Les Balkaniks.

Amás y como ye tradición, los asistentes al festival, l’eventu más importante d’esti tipu en tol Arcu Atlánticu, van tener ocasión de disfrutar d’un buen piñu d’actividaes complementaries, exposiciones, conferencies, alcuantros de lliterarura, esibiciones cinematográfiques, escursiones ya inclusive un partíu de rugby nel que vaa tomar parte una seleición del País de Gales. Precisamente Gales ye’l país al que va dir dedicada esta edición númberu 38 del FIL, socediendo asina a Escocia.