La Banda de Música d’Avilés ufierta 19 conciertos en 2017 y entama en Les Meanes

La banda de Música d’Avilés entama esti mes coles actuaciones programaes pa 2017, que van dexar que los avilesinos y avilesines esfruten, a lo llargo del 2017, d’un total de 19 conciertos.  La Banda como novedá ufierta esti sábadu una actuación nel Centru de Mayores de Les Meanes.

P’a esti 2017 apuéstase por reforzar los conciertos nos quioscos de la música del Parque de La Ferrera y El Muelle. Una midida que quier siguir col plan de recuperación d’estos espacios empecipiáu l’añu pasáu. Concretamente, van ser cuatro los conciertos que podrán vese ente primavera y branu nestos escenarios.

Como novedá, anguaño la Banda de Música d’Avilés va ufiertar una actuación nel Centru de Mayores de Les Meanes. Nél tocarán pieces de temática relixosa y van tar acompañaos por un coru. Va ser esti 25 de marzu y l’oxetivu ye intentar llegar a nuevos espacios escénicos de la ciudá y a nuevu públicu.

Otra novedá va ser el Conciertu de Seronda que va tener llugar n’ochobre na Casa de Cultura y nél que se va faer una repasada al repertoriu tradicional de la nuesa música. El Conceyu sigue apostando anguaño pola presencia de la formación nes fiestes de los barrios. Amás, van ufiertase tres actuaciones pa la Selmana Santa y a esto hai qu’añedir la presencia, como n’años anteriores, de la Banda de Música na procesión xeneral del Santu Entierru del Vienres Santu.

De forma paralela, la esposición sobre los 125 años de la Banda de Música d’Avilés va siguir hasta xunu visitando los colexos del conceyu. Una amuesa pa conocer de cerca a l’agrupación y que van esfrutar un total de 17 colexos y 8.000 alumnos.

Ver programación añal