Juan Carlos de la Fonte espón n’Avilés “Estensiones de la realidá”

Esti vienres, 6 de mayu, a les 13:00 hores, la conceyala de Cultura d’Avilés, Yolanda Alonso, inauguraba la esposición “Estensiones de la realidá”, de Juan Carlos de la Fonte Cabu nel Palaciu de Valdecarzana, que podrá visitase hasta’l 20 de mayu.

Juan Carlos de la Fonte inaugura Estensiones de la realidá, esposición cola que percuerre l’ampliu espectru de temes que trata con rara perfección: la semeya de la so fía Eita (qu’acompaña los cuadros con poemes alusivos a cada unu d’ellos), con una perspectiva visual dende ángulos improbables “siempres buscando daqué distintu, daqué qu’obligue a buscar otru puntu de vista”; los paisaxes vitales como L’árbol de la vida, o El Picu, una reconstrucción de la Naranxal de Bulnes, parés que nun-y son desconocíes al artista y que-y apurren otres emociones; maraviyosos bodegones rebosantes de color, que conviden a goler les mazanes con El desván, o les frutes llenes de vida en Blimes.

L’artista ruempe la llínea de lo figurativo n’Enigma, con formes que s’enrosquen sobre sí mesmes, ente que cuando la muyer ye protagonista, apaez desnuda amosando guapura o suxestión consiguíes con llombos infinitos, delicaos cadriles o anatomíes tropezoses, ensin una sola referencia esplícita al sexu nin tampoco a la cara de les muyeres.

Más información alrodiu de “Estensiones de la realidá” pue atopase na direición web que vien darréu: http://www.avilescultura.com/ye/Esposiciones.