Función d’ECA Teatru en La Fresneda

La compañía uvieina ECA Teatru va poner n’escena “Lisístrata 2.0”, la comedia de Aristófanes tantes vegaes representada n’a lo llargo de los sieglos. La cita, esti vienres 14 d’ochobre, a les 19.30 hores, nel Centru Cultural de La Fresneda.

Lisístrata foi la muyer qu’abanderó la primer fuelga feminista dende’l so papel principal na obra homónima de Aristófanes. Les muyeres d’Atenes y Esparta llegaron a un alcuerdu para detener les guerres de los homes. Tomaron l’Acrópolis, símbolu de poder y llugar sagráu de la Grecia clásica y escurrieron un severu castigu qu’obligara a los sos homes a abandonar el conflictu y tornar a casa.

Estrenada nel añu 411 a. C., la comedia de Aristófanes, tantes vegaes representada nel mundu a lo llargo de los sieglos, enceta con valentía concepto como l’amor, el sexu o la política. Conderga les guerres y el falsu puritanismu y constitúi una llucha pol trunfu de la razón.

ECA Teatru viaxa cola obra nel tiempu y recupera la versión llibre d’Enrique Llovet, estrenada en 1972. Una propuesta axilosa, enllena d’humor y desenfado, que’l so atrevencia nun llogró escapar de la censura de la dómina.

Güei ponemos de pies una Lisístrata actual y reconocible, que sigue creyendo na llibertá de la muyer y defende l’amor como arma más poderosa frente a la guerra.