Esta tarde inauguren en Valdecarzana la esposición “Autorretratos en versu”, de Jesusangel

El Palaciu de Valdecarzana acueye, del 3 al 19 d’agostu, la esposición “Autorretratos en versu”, del artista Jesusangel. Nesta amuesa, na que ta presente la obra más recién del autor, danse cita los sos dos grandes pasiones: la pintura y la poesía.

“Autorretratos en versu” podrá visitase nel Palaciu de Valdecarzana (C/El Sol, 1) de llunes a vienres, de 11 a 14 y de 18 a 21 hores. La inauguración d’esta esposición va ser esta tarde a les 19:30 hores, cola asistencia de l’alcaldesa d’Avilés, Mariví Monteserín.

Ana María Fernández, profesora titular d’Hestoria del Arte na Universidá d’Uviéu, define l’amuesa nel so polípticu esplicativu con estes pallabres: “En ‘Autorretratos en versu’, sumir nun mesmu cuadro l’acordanza más astracta de la poesía y la constatación concreta del paisaxe. D’esa manera llogra una suerte de fusión ente lo intelectual y lo real, que funciona con determinaes claves creatives”.

Jesús Ángel García Rodríguez, Jesusangel, ye natural de Carabanzo (L.lena). Estudió maxisteriu exerciendo la docencia en Caborana y Salinas. Empieza a esponer les sos pintures en 1976 y dende entós participó en distintes esposiciones individuales y colectives n’Avilés, Uviéu, Xixón, Barcelona, Madrid, Mieres, Llangréu, Candamo, Cangas, Castrillón, L.lena, Baena y Gante.

Los sos empiezos parten del figurativu al oliu, tratando’l paisaxe, la figura y el bodegón, pa evolucionar escontra llinguaxes más esquemáticos, n’ocasiones próximos a l’astracción, yá n’acrílicu. Funda en 1977 el Grupu Salinas, colectivu de pintores que dirixe hasta la so recién disolución.

Integra testos nes sos obres y ye nos últimos años cuando, buscando un acercamientu ente poesía y pintura, emplega versos de grandes poetes como elementos de la composición pictórica no que llama “Autorretratos en versu”. Ye un artista que nun participa en certames nin en concursos.