El primer contratu de The Beatles subástase por 500.000 euros

El contratu que roblaron The Beatles col representante Brian Epstein y que los llanzó a la fama en 1962 vendióse esti día nuna puya na casa londinense Sotheby’s por 365.000 llibres (503.000 euros).

Los cuatro integrantes del grupu roblaron pocos díes antes de publicar so primer senciellu, “Love Me Do”, un documentu que dexó a Epstein controlar los pormenores del despegue de la banda.

El contratu robláu por John Lennon, Paul McCartney, George Harrison y Ringo Starr, daba al mánager la última palabra en “tolos asuntos relativos a la vestimienta, maquillaxe y aspeutu del grupu”, y dába-y poderes pa despidir a dalgún de los músicos si producíense disputes ente ellos. Ensin esti contratu y la relación que selló sería inconcebible que The Beatles algamaren el mesmu ésitu.