Portada Plástiques El Parador San Marcos de Llión espón fondos del avilesín Cástor González

El Parador San Marcos de Llión espón fondos del avilesín Cástor González

by redacción asturnews

Hasta’l próximu 15 de xineru de 2023, el Conventu de San Marcos de Llión, güei Parador Nacional, acueye nes sales del anexu monumental del Muséu de Llión la esposición “Cástor González y el campu de concentración de San Marcos”, qu’amuesa fondos del artista avilesín depositaos nel Muséu de la Hestoria Urbana d’Avilés (MHUA).

Cástor González Álvarez (Avilés, 1913-2001), apuntáu nel exércitu republicanu mientres la guerra civil, pasó dellos años de condena nel campu de concentración de San Marcos y a pesar de les dures condiciones de vida del mesmu, exerció la so innegable vena artística, tantu nes artes pictóriques como nes musicales.

La esposición que s’ufierta gracies a la collaboración del MHUA axunta más de cincuenta dibuxos, bocetos, caricatures, postales, documentación personal, fotografíes, diseñu de monumentos,  etc. que s’atopen depositaos nel Muséu de la Hestoria Urbana d’Avilés por cesión del so fíu Cástor González Ovies.

Los documentos de Castor González Álvarez atestigüen el so procesu y condena al Campu. Tamién puede vese la so llibreta d’apuntes, cuartiyes sueltes con interiores del antiguu conventu, un par d’imaxes d’un patiu sumíu con prisioneros arrexuntaos, bocetos y traces para una insinia y escultura y caricatures de militares y compañeros, realizaos pol que fuera unu de los ‘inquilinos’ más llonxevos de San Marcos, d’ende que’l Muséu de Llión escorriera dende va tiempu entamar esta esposición.

Dende 1869 l’antiguu conventu foi la see histórica del Muséu de Llión, depués campu de concentración a la finalización de la Guerra Civil y güei Parador Nacional de San Marcos, onde se caltienen unos espacios para esposiciones temporales dependientes del Muséu de Llión.

Frutu d’ese trabayo y documentación, muncha d’ella inédita y d’innegable valor para describir la vida n’unu de los campos de concentración del bandu franquista más duros y sanguinarios col tratamientu a los presos, ye esta documentación que s’enmarca nel XI Alcuentru Internacional d’Investigadores del Franquismu, que tien llugar na Universidá de Llión, ente’l 16 y 18 de payares.

El Muséu de Llión ye xuna institución señera ente los equipamientos culturales lleoneses. Dependiente de la Xunta de Castiella y Llión, les sos más de cientu cincuenta años d’esistencia y la so nueva see central, nel conocíu como “Edificiu Pallarés”, en plenu centru de la capital lleonesa (Plaza de Santu Domingo, 8), convirtiéron-y nel referente de la hestoria de la vecina provincia.

La esposición ta comisariada por el mesmu Muséu de Llión y los testos que comenten el conteníu y formen parte del mesmu son de Cástor González Ovies, Luis Grau, Javier Rodríguez y Manuel Ángel Hidalgo, esti postreru director del Muséu de la Hestoria Urbana d’Avilés.

Los horarios de visita de l’amuesa son:

– Martes a sábadu: 10:00 a 14:00 y 17:00 a 20:00 h
– Domingos y festivos: 10:00 a 14:00 h

Tamién te podria gustar