El Muséu del Prado confirma una recuperación nel númberu de visitantes

El Muséu del Prado recibió en 2015 casi 2,7 millones de visitantes (2.696.666), unos 160.000 más que l’añu anterior, un aumentu del 6%. Y mientres el primer semestre d’esti 2016 yá lleva contabilizaos 1,55 millones.

En 2015 el muséu rexistró 2,7 millones de visites, un aumentu dende l’amenorgamientu constante a partir de 2011 y los datos confirmen la llínea ascendente de los últimos años, yá que nos seis primeros meses del añu pasáu recibieron 1,38 millones de visites. Daqué o enforma tendría que ver l’amuesa qu’esta institución dedica a El Bosco pa conmemorar el quintu centenariu de la muerte d’esti pintor holandés, inaugurada’l 31 de mayu y que va permanecer nel muséu hasta’l 11 de setiembre.

Solo en xunu, el so primer mes, recibió 150.790 visitantes y yá supera los 335.000 visitantes. El muséu previo’l “escepcional interés que xeneraría”, El Bosco. La esposición del V centenariu, y amplió el so horariu de visites. Quiciabes asina evite poner el cartelu de nun hai billetes que tuvo que colgar el branu del 2009 primero que rematara la esposición, Joaquín Sorolla (1863-1923), mientres les 16 selmanes que permaneció abierta recibió 459.267 visitantes.

La tónica vien siendo ascendente dende dempués de 2013, que llogró la peor cifra de los últimos cinco años con 2,4 millones de visitantes, pero inda nun s’algamaron los 2,94 millones de 2011. Esta selmana publicáronse nel Boletín Oficial del Estáu (BOE) les cuentes añales del exerciciu pasáu. La pinacoteca cerró 2015 con unes perdes cifraes en 81.093 euros, una importante meyora con respectu al añu anterior, cuando superaron el mediu millón d’euros. Los ingresos del añu pasáu alzaronse a 38,62 millones d’euros, lo que supon un 5,75% más qu’en 2014.

La institución destaca que mientres esti exerciciu tuvo llugar la adscripción del inmueble del antiguu Muséu del Exércitu, que supon una medría nos bienes de la institución de nueve millones d’euros.