El mural de Daniel Muñoz na plaza de Los Oficios protagoniza’l calendariu avilesín de 2018

Rematada la intervención artística na fachada de la cai Llanu Ponte d’Avilés, el nuevu mural de Daniel Muñoz na plaza de Los Oficios va protagonizar el calendariu avilesín de 2018.

Reproduciendo imaxes y testos referíos a la hestoria y al presente de la ciudá que’l públicu va dir afayando progresivamente y que l’almanaque municipal va ayudar a identificar ya interpretar, l’alcaldesa, Mariví Monteserín, destacaba na so presentación que “el mural forma parte del procesu de renovación de les entraes d’Avilés. Un procesu nel que vamos siguir avanzando”.

El nuevu mural de la plaza de Los Oficios d’Avilés, obra de Daniel Muñoz, reproduz distintes imaxes y testos referíos a la hestoria, y el presente d’Avilés, rellacionaos ente sí y que van ser progresivamente descubiertos ya interpretaos pol públicu. Inclúi edificios, lleendes, hestories populares ya imaxes de la vida cotidiana.

Tres la retirada del andamiu nel que Daniel Muñoz llevaba trabayando dende’l pasáu llunes 2 d’ochobre, l’alcaldesa Mariví Monteserín y l’artista presentaron a los medios de comunicación la resultancia final de la obra. Muñoz pretendió “amosar una información que xenere un interés nel públicu basáu na asimilación d’esta información al traviés del descubrimientu. El conxuntu xenera xuna primer sensación “entrevesgada” qu’afala a buscar relaciones ente les idees plantegaes al traviés de les imaxes y los testos. D’esta manera convidar al públicu a formar parte d’un procesu activu”.

“El mural tien enforma d’esi esfuerzu por sacar a la lluz coses qu’esisten na ciudá pero nun llegamos nunca a veles porque quedamos no superficial o no establecío. Ye una selección d’elementos que pretende espertar l’interés en convidar a la xente a afayar la ciudá, a caminar y nun siguir el percorríu establecíu que toos faemos”.

Precisamente pa facilitar esti procesu activu, l’alcaldesa anunció que’l calendariu municipal de 2018 va tar dedicáu a esti mural, al que se refirió como “nueva pieza del nuesu paisaxe urbano que toi segura de que se va a convertir nuna nueva seña d’identidá d’Avilés”.

Monteserín felicitó a Daniel Muñoz porque “supo reflexar los nuesos raigaños y les nueses aspiraciones como ciudá al reproducir aspeutos que reflexen el pasáu y el presente d’Avilés”. L’alcaldesa añedió que “la participación del movimientu vecinal de la ciudá contribuyó a que la resultancia final del mural dexe identificar y venos reconocíos nél”. “Daniel supo afigurar imaxes que reflexen la hestoria y el presente de toos los nuesos barrios, sobro les que la inmensa mayoría de los avilesinos podemos venos reconocíos énte dalgún de los sos elementos”, esplicó.

Más información sobro’l mural