El Conservatoriu d’Avilés acueye un recital de pianu de Pelayo Ciria

L’auditoriu del Conservatoriu Municipal Profesional Julián Orbón acueye güei vienres 25 de mayu, a partir de les 19:30 hores, un recital de pianu al cargu de Pelayo Ciria Capa.

Nesti conciertu va interpretar pieces de Ludwig van Beethoven, Johan Sebastian Bach, Maurice Ravel, amás d’abrir l’actuación interpretando la pieza Balada para manzorga, de Xavier Montsalvatge.

Pelayo Ciria Capa formose nel Conservatorio Profesional de Música de Alcalá de Henares (Madrid) cola profesora Marta Espinosa, rematando los sos estudios con Premiu Fin de Grau. Nesta dómina completó la so formación asistiendo a cursos impartíos por Claudio Martínez Mehner, Miguel Ituarte, Josep Colom, Marta Zabaleta, ente otros, y allegando a los cursos internacionales Pirineos Classics.

Llogró’l primer premiu Hazen del Conservatorio de Alcalá de Henares na modalidá de preseos solistes (2008). Tamién llogró mención d’Honor nel primer concursu Internacional de pianu “Villa de Madrid” (2013) y nel primer Concursu Internacional de pianu UAX-Kawai (2015).

Participó en conciertos nel Muséu Casa de la Moneda y na Aula de Música de la Universidá de Alcalá de Henares, y collaboró en diverses ocasiones cola Orquesta Ciudá de Alcalá. Anguaño cursa 1º d’Enseñances Cimeres nel centru Katarina Gurska en Madrid con el profesores Josep Colom y Bruno Vlahek.

Ver programa del recital