El Circu del Sol vuelve con una xira per España

Tres dos años paraos, el Circu del Sol vuelve llevantar la so carpa n’Europa con un xira que va pasar per España col espectáculu ‘Luzia’, una auténtica fiesta para los sentíos, surrealista y brillante que tien la vocación de provocar a la imaxinación.

“Esti ye’l momentu que toos tábamos esperando”, dicía la selmana pasada nuna nota Daniel Lamarre, presidente y director executivu de Cirque du Soleil Entertainment Group.

“Dempués de casi dos años, Cirque du Soleil torna a Barcelona, Alicante y Madrid: trés ciudaes nes que siempres nos sentimos como en casa”, añede Lamarre. “Ye un momentu especialmente emotivu para toos nós, yá que esperábamos ansiosos el nuesu regresu a los escenarios. Barcelona va ser el primer llugar onde la gran carpa volverá llevantase n’Europa, dende l’entamu de la pandemia”.

L’espectáculu ‘Luzia’ podrá vese en Barcelona (Districte Cultural de L’Hospitalet) a partir del próximu 17 de marzu. N’Alicante a partir del 14 de xunetu y en Madrid a partir del 5 de payares en 2022.

En 2021, Cirque du Soleil cumple 23 años de xires nel nuesu país, coles que presentó 14 espectáculos distintos en 19 ciudaes españoles. En más de dos décades, 9 millones d’espectadores solu n’España asistieron a los sos espectáculos. Más de 3.500 funciones que crearon una estrecha relación ente la compañía canadiense y el públicu del nuesu país. Agora, esta hestoria sigue col regresu del Circu del Sol y l’ambiciosa xira de ‘Luzia en Barcelona, Alicante y Madrid, xuna auténtica fiesta pa los sentíos, surrealista y brillante, na que participen abargana de 50 artistes.

‘Luzia’ ye una producción creada y empobinada por Daniele Finzi Pasca, que tresporta al corazón d’un México imaxinariu. “Un llugar salíu d’un suañu, onde la lluz sele l’espíritu y l’agua acorícanos”, detalla.

Con impresionantes acrobacies y grandes sorpreses visuales, ‘Luzia’ convida al públicu a somorguiase nun viaxe oníricu per un mundu vibrante y suntuosu suspendíu en dalgún puntu ente lo real y lo irreal.

Esmuciéndose ente un antiguu plató de cine, el vastu océanu, un salón de baille llenu de fumu o’l grebu desiertu, ‘Luzia’ pon n’escena munchos llugares, cares y soníos de México, entemeciendo tradición y modernidá.

Amás, per primer vegada, l’espectáculu incorpora nuna producción itinerante l’agua, “creando intres escepcionales”, añede’l so director.