Dopu Cena trai un tema en corsu sobre la tresmisión de la cultura y la llingua al Liet International

248

Dopu Cena ye un colectivu de músicos multi-instrumentistes que tienen como oxetivu principal revalorizar toles espresiones musicales de la tradición oral corsa. El grupu tien trabayao bien d’años promocionando y difundiendo canciones de música de baille corsa en cursos, festivales y fiestes. Nel añu 2011 sacaron a un tiempu dos cedés dedicaos a la música tradicional corsa: d’ún d’ellos editáronse 10.000 copies pa repartir de baldre en toles escueles de Córcega. Actualmente trabayen n’otru álbum de canciones recién creaes por ellos. Vienen al Liet International de Xixón con Trasmetta.

El corsu ye una llingua románica falada na islla de Córcega (Francia) y nel norte de Cerdeña (Italia). Comúnmente la llingüística allúgala como una variante del dialeutu toscanu italianu. Tien unos 150.000 falantes. Va dos años, la televisión francesa unvió un cantar en corsu al Festival d’Eurovisión, col tenor mozu Amaury Vassili.

Torna de la lletra del cantar al asturianu:

TRESMITIR

Lletra: Jean Michel Weber

Música: Michel Solinas

Tresmitite que la muerte nun va poder.

A ti, que nun sabes nada.

A ti, que pienses que la vida

ye un fluir infinitu

de mercar y vender,

de saber ensin comprender.

Tresmitite’l mio arguyu

de nacer nesti llugar sagráu,

que te va dar la brenga

pa ganar el pan de cada día.

Porque esta ye la única promesa

d’esta peña en mediu la mar.

Tresmitite una llingua

y una forma de vida

onde se tien al pie la familia,

ensin facer nunca promeses falses

porque la palabra dada

nun pue volvese atrás.

Tresmitite, si tu quies,

les llaves del paraísu,

fechu de montes y sol,

de besos y rises,

pero qu’en tiempu de traición

vuélvese un infiernu de dolores.