Cultura d’Avilés programa un cientu actividaes nes biblioteques y centros culturales

L’últimu trimestre del añu preséntase incesante tocantes a les propuestes que la conceyalía de Cultura d’Avilés preparó nos Centros Culturales Municipales. Van ser un total de 61 les actividaes programaes, un 11 per cientu más que nel anterior trimestre, nel que fueron esfrutaes por 1.809 persones.

La programación, totalmente gratuita y previa inscripción namá naquellos casos nos que s’indique, empresta una especial atención al públicu infantil y familiar.

Asina, van entamase sesiones de títeres, teatru y cine familiar, cuentacuentos infantiles, talleres d’animación a la llectura, bebecuentos y el conciertu de Música na Biblio a cargu del alumnáu del Conservatorio Municipal Profesional Julián Orbón, destináu a familiarizar a pequeños y pequeñes cola música clásica y los sos preseos.

Y al pie de ello, trés proposiciones al traviés del programa “Asturies, cultura en rede” de la Conseyería de Cultura, que fomenta la participación de los y el ceadores de la comunidá, según el tradicional espaciu para la llingua y la cultura asturianes traviés de los talleres entamaos pola Estaya de la Llingua d’Avilés.

Una programación consolidada, con un claru componente lúdicu y didácticu na destinada a la infancia, y que cunta en cada edición con una altu grau de participación. Ente les 1.809 persones qu’esfrutaron de les actividaes d’abril a xunu destaquen los 318 neños y neñes, acompañaos por dalgún familiar, que s’ablucaron colos cuentacuentos infantiles, o los 238 qu’atoparon el vezu llector gracies a los talleres infantiles d’animación a la llectura; los 212 espectadores del teatru familiar, o los 114 del cine familiar.

Coles mesmes, cabo reseñar la fidelidá de los 702 espectadores y espectadores qu’asistieron a les seis representaciones de l’Amuesa de Teatru Amateur, con una media percima de cien persones en cada función.