Portada Conceyos ‘La Fábrica de Sombreros de Xixón, La Sombrerera’ protagoniza esposición

‘La Fábrica de Sombreros de Xixón, La Sombrerera’ protagoniza esposición

by redacción asturnews

‘La Fábrica de Sombreros de Xixón, La Sombrerera’ protagoniza una esposición nel Centru Municipal Integráu Atenéu de La Calzada de Xixón que va poder visitase hasta’l 8 de payares de 2022, con visites de 9 a 20 hores,

La Fábrica de Sombreros de Xixón, conocida popularmente como La Sombrerera, empecipió la so producción a principios del sieglu XX na zona industrial de La Calzada con arreglu a los últimos adelantos fabriles de la dómina. Foi otra d’aquelles grandes empreses qu’ente mediaos del sieglu XIX y bona parte del XX fixeron del oeste de la ciudá un referente industrial n’Asturies y n’España.

En funcionamientu ente 1901 y finales de la década de 1950, cola impresionante edificación que podemos almirar nes escases imaxes que d’ella se caltienen, cola so gran chimenea entós daquella tan característica. Pa formase una idea de la importancia de la so producción basta conseñar que, va cien años, yá producía añalmente unos 350.000 sombreros de fieltru de llana y más de 150.000 de fieltru de pelo; esto ye, abargana de 1.500 sombreros diarios. Complementos que se vendíen con rapidez, non solo nes polenques tiendes qu’empezaron a abondar a partir de los años venti nes principales ciudaes y villes asturianes, sinón tamién per tierres hispanoamericanes. Tenemos De recordar que munchos emigrantes llucíen estos sombreros con marchamo européu como un símbolu de estatus y de querencia a la so tierra.

Col cambéu de les modes l’usu del sombreru foi menguando, cerrando la fábrica a finales de los años cincuenta, siendo ocupaes les sos instalaciones por otres empreses que treslladen ellí la so actividá. Nel añu 1988 ye finalmente baltada pa la construcción del primer centru de salú del barriu y de bloques de viviendes; al igual que les populares cases de La Sombrerera, construyíes en 1901 pal so usu pol personal de la fábrica y baltaes nel añu 2004 pa llevantar nuevos edificios. Con ello sotiérrase y piérdese, de nuevu, otru restu de la hestoria y del pasáu industrial de los barrios del oeste de Xixón.

Los y les trabayadores de La Sombrerera aportaron a más de doscientos na so dómina de rellumanza, y yeren conocíos pol so fuerte compromisu nes reivindicaciones obreres, destacando l’actividá del so sindicatu anarquista El Fieltru, venceyáu a la CNT. Llama l’atención igualmente la presencia de neñes y neños na so plantiya, a pesar de la peligrosidá de dalgunos de los productos químicos que se manipoliaben.

Axuntamos nesta amuesa tou la información a la que pudimos aportar, siendo conscientes de les numberoses llagunes que’l pasu de los años produció; un escurrir del tiempu bien inxustu cola hestoria y el patrimoniu industrial asturianu. Quiciabes na memoria de dalgún vecín o vecina de La Calzada espierten dellos alcordances na so visita, o afaye dalguna imaxe n’unu de los sos vieyos álbumes que nos ayudar a siguir completando la fascinante hestoria d’esta fábrica que foi, ensin batura a duldes, xuna de les industries testiles más importantes de la cornisa Cantábrica.

Centru Municipal Integráu Atenéu de La Calzada Del
6 d’ochobre de 2022 al 8 de payares de 2022 De 09:00 a 20:00

Tamién te podria gustar