Alicia Calzón espón na Casa Cultura de Grau del 11 al 31 de marzu

La Conceyalía de Cultura del Conceyu de organiza una esposición de pintura de l’artista Alicia Calzón. L’amuesa va tar abierta del 11 al 31 de marzu nel corredor de la Casa Cultura de Grau.

La pintora Alicia Calzón (Uviéu, 1961) presenta una esposición individual compuesta por una trentena d’olios de medianu formatu, ente los que predominen los paisaxes y los bodegones. De vocación madura, anque dende siempres inquieta nel arte de crear, y de formación autodidacta, entama en feches recién la so andadura pictórica más reflexiva recibiendo clases de pintura nel taller de Luis Repiso n’Uviéu.

Ente les sos esposiciones más recién tán les celebraes en Les Arriondes, La Pola L.lena, el Centru Asturianu d’Uviéu o la Galería Mariña de Diego de la mesma ciudá, ente otres munches. Tamién participó en diversos certámenes y foi escoyida como finalista nel XVI Concursu de Muyeres Pintores del Oriente d’Asturies en 2009.

De factura academicista y clásica, l’artista decántase decididamente por una paleta de colores nidios, matizaos y permediaos, que-y sirven pa encetar una amplia temática na que se conxuguen la lluz, les tonalidades y les formes. Utilizando la técnica tradicional del oliu sobro llenzu, Alicia Calzón propón una esposición llena de frescura y color, colgando na Casa Cultura de Grau una selección de lo meyor de la so obra pictórica d’apocayá.