Portada Plástiques Abrió en La Vega la I Selmana Profesional del Arte d’Uviéu

Abrió en La Vega la I Selmana Profesional del Arte d’Uviéu

by redacción asturnews

El presidente de la Fundación Municipal de Cultura, el conceyal José Luis Costillas, exerció como anfitrión de la visita institucional cola que la Fábrica d’Armes de La Vega abrióse a la I Selmana Profesional del Arte d’Uviéu.

La Primer Selmana Profesional del Arte d’Uviéu trai a Uviéu, hasta’l día 14 de xunu, una programación inédita y hestórica en redol a la disciplina de les artes plástiques. Más de 50 artistes, dellos consideraos los meyores del mundu, van dexar la so buelga estos díes n’Uviéu, n’escenarios singulares como ésti nel qu’atopamos, al traviés d’esposiciones, conferencies, talleres, conciertos y performances. “Esta I Selmana del Arte d’Uviéu naz con vocación de continuidá, con vocación de soplar munches veles, pero con esa emoción de les primeres vegaes. Porque va ser la primer vegada qu’Uviéu pueda escuchar al maestru de la pintura realista nuna conferencia na Filarmónica, el nuesu primer alcuentru con un artista de la talla d’Antonio López que yá nun tien como costume, nin siquier, salir de casa. Porque va ser la primer vegada que n’Uviéu suenen al unísonu les campañes de siete templos al son d’una partitura escrita pol músicu y campaneru más aclamáu del mundu, el precursor del arte sonoro contemporaneu, Llorenç Barber. Les cais del Uviéu Antiguu repicarán al ritmu d’una música nunca antes escuchada nesta ciudá, con una protagonista, la campana en funcionamientu más antigua del mundu, la Wamba, que lleva dende principios del sieglu XIII presidiendo la torre de la Catedral ensin qu’a naide hasta agora asocediérase-y dedica-y un conciertu. Home, ocho sieglos dempués yo creo que yá yera hora….”.

A Uviéu, a xuiciu del responsable municipal de Cultura, “acoxáben-y pates na so programación cultural. Faltar festivales de música alternativa, faltába-y ociu y cultura pel branu que nun nos obligara a colar a otres ciudaes, faltába-y música d’autor, jazz, actividaes pa esfrutar tola familia xunta, y faltába-y un programa dedicáu al Arte con mayúscules. La Selmana Profesional del Arte llega pa suplir esta falta y pa “apadrinar” esi pruyimientu de consumir arte de quien se sentíen güérfanos d’actividaes como ésta na capital del Principáu”. Lo que ta asocediendo n’Uviéu nun tien precedentes nesta ciudá. Consiguir qu’una capital d’una provincia pequena, como la nuesa, que nun ye Madrid, nin Barcelona, vaiga consiguir la comunión de dalgunos de les pata negra de les artes plástiques d’España y de too el mundu, xuntu colos artistes y galeríes locales, ye un  FINXU na hestoria de la programación cultural uvieina”.

Tamién te podria gustar