Yá se conocen los actos de la XI Fiesta de la Oficialidá de la Llingua Asturiana de Bimenes

19 xunu 02:49 2007 Imprimir

Redacción.

La XI Fiesta de la Oficialidá de la Llingua Asturiana va celebrase en Bimenes, del 6 al 14 de xunetu y los actos que van llevase alantre acaben de dase a conocer polos organizadores. La presentación del programa d’actos va ser el vienres 6 xunetu a les ocho la tarde, na Casa la Cultura de Santuyano. Pero yá dende’l llunes que vien y hasta’l 16 de xunetu nesi mesmu llugar y n’horariu de 15.30 a 19:30 hores va tar abierta la esposición de les obres presentaes al “IV Concursu de Cómic n’Asturianu” de la Comarca la Sidra.

Ente les actividaes que van celebrase destaquen l’Asturcine, una proyección de curtiometraxes en llingua asturiana na que collabora l’Asociación de Realizadores y Direutores d’Asturies (ARDA), la representación de la obra ‘El burru del tíu Bernaldo’ a cargu del grupu Ensin Reparu y la entrega de premios del X Concursu de Cuentos pola Oficialidá del Asturianu.

Amás va celebrase l’actuación de Carlos Alba ‘Cellero’ o la V Feria d’Artesanía y Mercáu de Productos Agroalimentarios, pasacais de grupos folklóricos o’l pregón, a cargu esti añu de Lluís Xabel Álvarez García, filósofu, escritor y profesor de la Universidá d’Uvieu y miembru de l’Academia de la Llingua Asturiana. Otros actos van ser la misa n’asturianu, la Puya’l ramu, l’actuación de grupos folklóricos y la xinta popular de fabes y arroz con lleche. Nos actos va actuar el Cuartetu Torner y el pieslle va ponerlu l’actuación de La Cirigüeña y DJ – J15’l sábadu 15 de xunetu a ls 22:00 hores.

  Categories:
Loading Facebook Comments ...