Portada Emigración Los alumnos del programa ALAS finaron la so estancia n’Asturies con un actu na Universidá

Los alumnos del programa ALAS finaron la so estancia n’Asturies con un actu na Universidá

by asturnet

La primer promoción de becarios del programa d’ayudes ALAS, empobináu a universitarios americanos descendientes d’emigrantes asturianos, pusó ayeri puntu y final a la so estancia n’Asturies y a la so esperiencia universitaria nel Principado. Nun actu cellebráu na sala de prensa del Edificiu Hestóricu de la Universidá d’Uvieu, los alumnos que se beneficiaron nesta primer vegada de los sofitos del programa ALAS quisieron mostrar la so gratitud hacia los responsables del programa, a l’Universidá y al Gobiernu del Principáu d’Asturies, sobre manera a l’Axencia d’Emigración.

Seis de los siete alumnos que formaron la primer fornada d’estudiantes d’esti programa pioneru nel ámbitu de la educación participaron nel actu de despedida xunto col rector Juan Vazquez, el Vicerrector de Rellaciones Internacionales de l’Universidad, Francisco Javier Mato, el Conseyeru de Xusticia, Seguridá Pública y Rellaciones Esteriores, Francisco Javier García Valledor, la Conseyera de Cultura, Ana Rosa Migoya, el Director de l’Axencia Asturiana d’Emigración, Luis Miguel Fernández Romero, y la Directora del Institutu Asturianu de la Xuventú, Carmen Barrera.

El rector de la Universidad d’Uvieu, Juan Vazquez sorayó durante la so intervención, que proyectos como’l programa ALAS constituyen unes de les meyores polítiques que se puen facer por Asturies y pidio-yos a los estudiantes participantes “qu’actuen como difusores y embaxadores de l’Universidá d’Uvieu nos sos países d’orixen”. Vazquez quiso agradecer al Gobiernu del Principáu les facilidaes que yos prestaron en tou momentu para poder sacar alantre’l proyectu y confíó en que “la segunda edición d’esti programa cuente con mayor difusión y un mayor númberu d’estudiantes”.

Valledor pola so parte, admitió que nestos cuatro años de trabayu cola emigración deprendió lo que ye querer a Asturies pese a la distancia y el vraeru significáu de la señaldá. El Conseyeru de Xusticia, anguaño en funciones tamien quiso espresar la so satisfacción pol esitu del prgrama ALAS ya que yera un de los oxetivos que’l so partíu había marcao al entamu de la llexisllatura.

L’actu sirvió pa presentar la nueva convocatoria de sofitos del programa pal cursu 2007-2008. Pa esta nueva edición, el vicerector de Rellaciones Internacionales de l’Universidá, Francisco Javier Mato anunció importantes novedaes ya que la estancia de los estudiantes nun se va llimitar a un cuatrimestre sino a un cursu lectivu completu. Por otra parte van ufiertase 10 ayudes de 2000 euros pa gastos de viaxe con estancia gratuita na residencia “Ramón Menendez Pidal” d’Uvieu, y cinco ayudes para viaxe y manutención de 3500 euros.

A estos sofitos, cuyu plazu pa presentar la solicitud fina’l prósimu 20 de Xunu, van poder optar todos aquellos solicitantes que sían descendientes d’emigrantes asturianos y que estudien nuna universidá americana con voluntá d’amestase al protocolu de collaboración del Principáu d’Asturies y l’Universidá d’Uvieu.

Tamién te podria gustar