Vuelven los Taragaños del Cofrade a Uviéu

El conceyal de Turismu y Hostelería, Alfredo García Quintana y David González Codón, presidente de OTEA Uviéu, presentaron esta selmana, en rueda de prensa, la XII edición de Taragaños del Cofrade, que va desenvolvese dende’l vienres 31 de marzu al domingu 9 d’abril.

Quintana sorrayó la importancia d’esta iniciativa hostelera de OTEA “qu’inclúi la gastronomía dientro de la Selmana Santa d’Uviéu. Esti equipu de gobiernu dio-y un impulsu a la Selmana Santa–ayeri l’Alcalde inauguraba la esposición de la Xunta d’Hermandaes en Trascorrales, empezaba l’I Ciclu de conciertos de música de Selmana Santa y habilitábase un apartáu na web visitoviedo.info con tola información de la Selmana Santa y semeyes en 360 graos de les procesiones, amás de la ufierta gastronómica-“.

El responsable municipal de Turismu sorrayó que, un añu más los Taragaños del Cofrade “van sirvir pa dinamizar el sector nuna dómina tan importante dende’l puntu de vista turísticu” y estimó a la Xunta d’Hermandaes y Confreríes de Selmana Santa qu’Uviéu sía la ciudá con mayor númberu de confreríes y hermandaes d’Asturies, “seis na actulidad más una sétima, la Hermandá de la Resurrección, na Ilesia de La nuesa Señora de Cuadonga”.

David González Codón sorrayó que, colos Taragaños del Cofrade, “la hosteleria d’Uviéu vuelve demostrar el so sofitu a los actos de la ciudá y a los uvieinos y visitantes mientres esta Selmana Santa”. La iniciativa, añedió, “ufierta dende’l vienres 31 de marzu al domingu 9 d’abril de 2023, dambos inclusive, pinchos de Selmana Santa (Taragaños del Cofrade) en 25 establecimientos y tamién la posibilidá de tastiar en siete de los restoranes participantes menúes específicos de vixilia (Menú del Cofrade)”. Tamién va haber, como n’otros años, ‘gastromapas’ nos que se va poder información de los establecimientos participantes, los horarios, el nome del Taragañu, la so dirección y un espaciu pa ‘sellar’ l’establecimientu en tastiando cada taragañu, amás d’un planu d’Uviéu cola situación de los establecimientos participantes ya información sobro’l percorríu de caúna de les procesiones y un documentu de votu del taragañu preferíu y papeleta de participación nel concursu de Taragaños del Cofrade. El preciu de vienta del Taragañu del Cofrade y del Menú del Cofrade ye llibre per parte de cada establecimientu”.

Nos Taragaños del Cofrade, los meyores pinchos son escoyíos por aciu votación popular y faise al traviés d’un gastromapa, qu’una vegada completáu col mínimu de sellos, tendrá de depositase na urna que cada establecimientu participante. Tolos votos recibíos que cumplan los requisitos van entrar nun sortéu d’una escapada a Asturies, qu’inclúi nueche d’agospiamientu, almuerzu y comida o cena.

Pa dar promoción na rede de Facebook a Taragaños del Cofrade los veceros que xuban al Facebook de Otea semeyes de Taragaños y tamién participen nun sortéu d’un Menú del Cofrade. El Taragañu que recibiera mayor númberu de votos populares va ser proclamáu ganador y va recibir el Capirote d’Oru. El segundu en númberu de votos, el Capirote de Plata, y el terceru, el Capirote de Bronce.