Gastronomía Tierra Astur abre un llagar na fábrica del Águila en Cualloto by asturnet 9 de mayu, 2005 La vieya fábrica de cerveza de l’Aguila Negra de Cualloto tien dende ayer un nuevu usu como establecimientu hosteleru dedicáu a especialidaes de la gastronomía asturiana. La empresa Tierra Astur ye la empobinadora d’esti nuevu negociu que s’inauguró ayer nun actu al qu’acudieron abondes personalidaes de la vida pública de la nuestra comunidá y nel qu’Annabel Santiago, Chus Pedro, Jorge Tuya y Luis Estrada punxeron los cantares pa recalcar inda más el calter de llagar tradicional del establecimientu. La segunda sidrería de Tierra Astur abrióse ayer nes antigües instalaciones de la fábrica del Águila Negra en Cualloto con un actu que quería arrepresar toles esencies afayadices de les espiches tradicionales: sidra, productos del país y los cantares de dalgunes de les voces más valoratibles de la música asturiana. El nuevu proyectu hosteleru del empresariu César Suárez tenta recrear l’ambiente de los clásicos llagares tradicionales nun complexu de 750 metros cuadraos y con capacidá pa cuatrocientes persones. Amás de les sos funciones habituales como sidrería, el nuevu establecimientu ufiértase como un espaciu destináu a acoyer toa clase d’espiches, xintes d’empresa, aconceyamientos y convenciones. El local de Tierra Astur en Cualloto tenta ufiertar un nuevu conceptu de llagar-sidrería afayáu a los tiempos actuales y a una clientela potencial cada vez más desixente a la hora de valorar la calidá de los productos ufiertaos, de la so restauración y del serviciu ofrecíu. La empresa de César Suárez ya dio una novedosa vuelta de tuerca al conceptu tradicional de sidrería nel establecimientu que tien abiertu na cai Gascona d’Uviéu y nel qu’amás de los servicios de restauración, cola sidra como principal bebida, acueye nes sos instalaciones una tienda de productos autóctonos d’alta calidá de la empresa Crivencar y xestiona un portal n’Internet col mesmu nome, dedicáu a la vienda d’estos productos, aprovechando les posibilidaes del comerciu electrónicu. A la inauguración d’ayer del llagar de Tierra Astur en Cualloto asistieron abondes personalidaes de la vida pública asturiana: empresarios, políticos, profesionales de los medios de comunicación, artistes y músicos, diéronse cita p’arropiellar cola so presencia la nueva iniciativa empresarial puesta en marcha. La espicha d’inauguración cuntó coles actuaciones d’Anabel Santiago & Michael Lee Wolfe, Chus Pedro Suárez, los cantadores Luis Estrada y Jorge Tuya, Xosé Ambás y la pareya de músicos Xosé Nel Exposito y Milín, nun actu que presentó el cantante de Dixebra, Xune Elipe. 9 de mayu, 2005 0 FacebookTwitterPinterestEmail
Gastronomía Los productores de Tierra de Cangas saquen al mercáu más de 150.000 llitros de vinu by asturnet 17 de xineru, 2005 El vinu de Cangas del Narcea realcuéntrase col mercáu. Los productores integraos na marca distintiva Vinos de la Tierra de Cangas ultimen los sos llabores pa sacar a la venta más de 150.000 llitros de vinu ellaboráu nel conceyu del suroccidente, depués d’una collecha que l’añu pasáu llevó a les bodegues un total de 150 tonelaes d’uves. Según los datos apurríos na so edición de güei pol diariu El Comercio, la producción que sacarán al mercáu les bodegues asociaes a la Indicación Xeográfica Protexida Vinos de la Tierra de Cangas va suponer aprosimadamente la mitá de tol vinu d’esi conceyu qu’aportará esti añu a los consumidores, yá que’l restu de producción orixínenla ellaboradores artesanos ayenos a la marca distintiva. Productores, llagareros y hosteleros del conceyu asturianu vinícola por escelencia axuntáronse l’añu pasáu a un proyectu européu que quier da-yos puxu a los vinos más desconocíos d’España, Francia y Portugal, col envís declaráu de saca-y partíu turísticu a la promoción de la cultura vinícola y baxo la denominación de ‘Rutes inédites del vinu nel Sudoeste d’Europa’. Amás del principal conceyu productor de vinu n’Asturies, formen parte del proyectu les rexones franceses d’Aquitania, Midi-Pyrénées y Languedoc-Roussillion; zones del centru y norte de Portugal, como Coimbra y Vale do Ave; y territorios vinícoles de Baleares, Cantabria y Canarias. Toos ellos busquen axuntar esfuerzos pa facer un vinu meyor y más rentable, dientro d’un plan ampliu qu’afita como horizonte de trabayu los prósimos dos años y prevé la esplotación turística de llagares y otros elementos del patrimoniu etnográficu, la edición de cartafueyos p’atrayer a visitantes y la cellebración de conferencies especializaes. 17 de xineru, 2005 0 FacebookTwitterPinterestEmail
Gastronomía Asturnews entrega la so cesta de navidá al ganador del sortéu, Pablo Pastor Camporro by asturnet 21 d'avientu, 2004 El llector d’Asturnews Pablo Pastor Camporro, vecín d’Uviéu, recoyó esta mañana la cesta navidiega que’l diariu cultural sorteaba ente los sos llectores, un llote de productos gastronómicos artesanos de primer calidá ellaboraos o distribuyíos pola empresa La Payariega, firma pionera nel etiquetáu en llingua asturiana. Depués de resultar ganador nel concursu abiertu por Asturnews, que rexistró gran participación, Pablo Pastor pondrá na so mesa navidiega un llote compuestu por turrones artesanos, sidra natural y gasificao, zumos, conserves vexetales, condimentos, fervíos, aceites, productos cárnicos, fabes, marmellaes y galletes d’ellaboración casera. Los llectores participantes del sortéu navidiegu d’Asturnews, cuya entruga única consistía en designar la ‘noticia del añu’ publicada nesti diariu cultural a lo llargo de 2004, destacaron l’aniversariu de Conceyu Bable, les cifres de matriculación en Llingua Asturiana, el pieslle de la Xunta d’Escritores y la preparación d’un nuevu discu del grupu Dixebra, ente otres informaciones apaecíes n’Asturnews. 21 d'avientu, 2004 0 FacebookTwitterPinterestEmail
Gastronomía Samartín del Rei Aurelio propón homoxeneizar la imaxe de los chigres a partir de la tradición by asturnet 11 de payares, 2004 Chigres de diseñu enraigonaos nes costumes populares. Esi ye l’oxetivu que persigue l’Ayuntamientu de Samartín del Rei Aurelio, promotor d’una campaña d’homoxeneización de la imaxe de les sidreríes que-yos ufierta un estudiu de diseñu gratuitu a los titulares d’actuales y futuros chigres. El conceyu cellebra a partir de güei la Fiesta Gastronómica de los Nabos con tonada, pasucáis y folclore internacional. L’envís del municipiu de la cuenca’l Nalón pasa por facer de les sidreríes llocales con una seña d’identidá propia, y pa ello propón diseñar y decorar los establecimientos hosteleros d’esi tipu con elementos de la cultura ya hestoria asturianes y un ambiente “acoyedor”. L’exemplu: El llocal ‘El chigre d’Aurelio’, concebíu como bar pero con posibilidaes adicionales de funcionar como restaurante y tienda. Samartín del Rei Aurelio somórguiase güei na cellebración de la Fiesta de los Nabos, cuyu programa d’actos ta amenazáu pol mal tiempu. Pa esta tarde tán previstos un recital de tonada asturiana a les 18 hores na Plaza Ramón y Cajal, el pregón y la entrega’l ‘Nabu d’Oru’ a la Banda de Música del conceyu. El programa festivu siguirá mañana, vienres, con pasucáis y l’actuación d’un grupu de folclores tradicional húngaru, y tendrá continuidá nel fin de selmana cola animación d’agrupaciones musicales d’Asturies, Galicia y Murcia (sábadu), mientres que’l domingu cellebraráse una feria monográfica de la miel. Con epicentru en Sotrondiu, la Fiesta de los Nabos entamóse nos años setenta, cuando un grupu de vecinos decidieron creala n’homenaxe a un productu cultiváu nel conceyu dende l’añu 774, cuando, según les cróniques, el Rei Aurelio fundó’l municipiu. La cellebración coincide cola festividá de San Martín de Tours, patronu’l conceyu. 11 de payares, 2004 0 FacebookTwitterPinterestEmail
Gastronomía Una web asturiana corónase como meyor páxina hispana nos prestixosos premios del Salón del Vinu by asturnet 4 de payares, 2004 La gastronomía on-line d’Asturies, na vanguardia. El sitiu web de la empresa La Galería del Vino, domiciliada en Xixón, figura en cabeza ente les cien páxines qu’optaben al premiu a la meyor web vinícola de fala hispana, qu’otorga el prestixosu Salón Internacional del Vinu y que s’entregará nel trescursu d’esi eventu, en Madrid, na cabera selmana de payares. Con más de 20.000 votos recibíos vía Internet, que se traducen en poco más de cien mil puntos acordies col sistema de puntuación establecíu, la web xixonesa algamó na pasada medianueche el premiu, que cuenta con amplia reconocencia nel sector vinícola pola importancia del foru onde s’otorga el galardón. En segundu y tercer puestu figuren, respectivamente, una páxina arxentina y un portal rexistráu en Valladolid. El V Salón Internacional del Vinu cellebraráse nel Parque Ferial de Madrid ente los prósimos 23 y 25 de payares y axuntará, como n’ediciones anteriores, a los principales productores, distribuidores, entidaes corporatives y medios de comunicación especializaos vinculaos al sector vitivinícola. Constituyida a primeros de 1998 en Xixón, La Galería del Vino ta vinculada al grupu gastronómicu Salastur, que se destaca pola so sensibilidá p’hacia la llingua asturiana nel etiquetáu y promoción de los sos productos, y ultima la salida a la rede d’una revista gastronómica on-line editada dafechu en llingua asturiana. Llista de candidatos al premiu a la meyor web vinícola 4 de payares, 2004 0 FacebookTwitterPinterestEmail
Gastronomía El Grupu Salastur prepara la edición d’una pionera revista gastronómica n’asturianu p’antes de fin d’añu by asturnet 12 de setiembre, 2004 L’actualidá gastronómica, dafechu n’asturianu. El Grupu Salastur, qu’integra a cuatro firmes del sector gastronómicu, ultima la salida a la rede d’una revista on-line en llingua asturiana cuyos responsables quieren asoleyar antes de fin d’añu, nuna iniciativa pionera que pretende incluyir amás información de viaxes y falar “non sólo de coses d’equí, sinón de coses del mundu pa los asturianos”. Magar que’l proyectu ta entá na so fase d’última definición -falta, por exemplu, concretar la periodicidá de la publicación, que va llamase www.zapica.com-, l’envís de los sos promotores ye estudiar una posterior edición en papel de la revista, si bien esti segundu pasu tará condicionáu polos altos costes que requier una impresión periódica de calidá. No que cinca a los conteníos, según declaren los responsables del proyectu, la nueva publicación prevé basase na gastronomía y quier ufrir amás información sobro viaxes, col propósitu declaráu de facer interesantes los testos al públicu non especializáu, o en pallabres de los promotores de la revista, que los llectores “puean alcontrase perbién ensin saber res de vinos, platos o sidra”. El responsable’l diseñu de la nueva web gastronómica sedrá Heliodoro García, que yá exerce como alministrador de les páxines n’internet del Grupu Salastur, integráu pola distribuyidora RCS Helmántica, La Galería del Vino, l’espaciu pa l’alta gastronomía La Despensa y la ellaboradora La Payariega, web qu’ufierta tolos sos conteníos y productos dafechu en llingua asturiana. Web de La Payariega 12 de setiembre, 2004 0 FacebookTwitterPinterestEmail
Gastronomía Los criadores d’oveya xalda recibirán cien mil euros pa garantizar la continuidá de la raza by asturnet 29 d'agostu, 2004 Un total de 103.000 euros pa garantizar la continuidá de la oveya xalda y meyorar el so potencial gastronómicu. Representantes de l’asociación de criadores d’esa raza animal (Acoxa) y de la Conseyería de Mediu Rural y Pesca firmaron esta mañana un conveniu n’Uviéu que tendrá aplicación nos prósimos tres años y que busca financiar la sobrevivencia óptima de la oveya xalda asturiana. “Si güei la carne de corderu xaldu ye de primera calidá, agora va dase-y tovía mayor seguridá al consumidor de lo que ta comiendo”, felicitóse’l responsable de l’asociación de criadores na firma l’alcuerdu, José Antonio Álvarez, pa quien el conveniu suscritu esta mañana con Mediu Rural supón un importante emburrión pa la pervivencia d’una raza cuyu censu baxó enforma n’Asturies dende la década de los años cincuenta. L’Asociación de Criadores d’Oveya Xalda (Acoxa) agrupa a casi sesenta productores enfotaos en caltener y meyorar la comercialización de la singular oveya asturiana, caracterizada físicamente por tener la tiesta y les oreyes pequeñes, el rau curtiu y con pates fines de pezuñu duru. L’alcuerdu rubricáu ente los criadores y l’Alministración autonómica, que va desendolcase baxo la supervisión de técnicos del Principáu, valdrá asinamesmo pa mantener un bancu de xermoplasma que permita favorecer biolóxicamente la continuidá de la oveya xalda. Web de l’Asociación de Criadores d’Oveya Xalda 29 d'agostu, 2004 0 FacebookTwitterPinterestEmail
Gastronomía El Principáu comprométese a financiar al 50 por cientu les futures campañes de promoción de la sidra by asturnet 24 d'agostu, 2004 El Gobiernu autonómicu sufragará al cincuenta por cientu futures campañes de promoción de la sidra y d’otros alimentos acoyíos a denominación d’orixe. Esi ye’l compromisu qu’ayeri asoleyó la conseyera de Mediu Rural y Pesca del Principáu, Servanda García, pa quien les marques de calidá de productos agroalimentarios “nun tienen sentíu” si nun son publicitaes. Por esa razón, y nel trescursu d’una entrevista radiofónica concedida a la cadena Cope, García fizo un llamáu a aumentar l’ayuda económica del Principáu a l’espoxigue y consolidación de productos con denominación d’orixe, y destacó la sidra como’l que debe centrar los mayores esfuerzos, con un esfuerzu notable de publicidá nel esterior d’España. Les declaraciones de la titular de Mediu Rural lleguen nos díes previos al llanzamientu d’un plan de promoción de la sidra natural asturiana que cuenta col aval de la Ministra d’Agricultura, Elena Espinosa, y que’l Gobiernu autonómicu empezará a diseñar en setiembre con un envís central: Abri-y nuevos mercaos a la bebida tradicional d’Asturies. En principiu, esa campaña centraráse n’espardir el consumu de sidra nel ámbitu estatal, con ‘saltos’ al circuitu internacional al traviés de la presencia n’eventos feriales y ceñida a la sidra acoyida a la denominación d’orixe, magar que los llagareros camienten que la campaña beneficiará tamién a la sidra ayena a esa marca de calidá. 24 d'agostu, 2004 0 FacebookTwitterPinterestEmail
Gastronomía La carne de xata empieza comercializase baxo denominación d’orixe protexida de la Unión Europea by asturnet 22 d'agostu, 2004 La carne de xata asturiana cuenta yá col másimu nivel de protección na Unión Europea. Los productos comercializaos cola marca “ternera asturiana” acuéyense dende’l pasáu vienres a una denominación d’orixe protexida d’ámbitu européu, certificación que destaca los productos cuyu procesu completu d’ellaboración complétase nuna zona determinada de la UE. D’esti mou, la carne de xates asturianes de los valles y de la montaña criaes dafechu nel Principáu y sacrificaes con una edá másima d’ente 12 y 18 meses empezará a salir al mercáu avalada por una de les tres referencies de productos agroalimentarios que les autoridaes europees potencien dende 1992 pa destacar la calidá y l’orixe d’esos productos. La marca “ternera asturiana” requier que los animales que s’acueyan a ella tengan mamao a lo menos cinco meses de la ma y s’alimenten con lleche materno, cereales y lleguminoses. Los espertos sostienen que la esistencia de la vaca asturiana como raza estremada ta documentada nel sieglu V antes de Cristu. L’Executivu comunitariu aprobó, amás d’a la xata asturiana, concede-y la denominación d’orixe protexida a les carnes de la Sierra’l Guadarrama, Cantabria, Navarra y Euskadi, comunidaes estes dos caberes que promocionarán el so productu dafechu n’euskera como ‘Nafarraoko Aratxea’ y ‘Euskal Okela’. Web de la denominación d’orixe 22 d'agostu, 2004 0 FacebookTwitterPinterestEmail
Gastronomía Villaviciosa plantega una escuela d’escanciadores pa propiciar l’accesu de paraos a la hostelería by asturnet 10 d'agostu, 2004 ‘Producir’ bonos escanciadores pa meyorar l’accesu de la mocedá a un puestu de trabayu na hostelería. Con esi envís echará a andar a partir del añu prósimu una escuela d’escanciáu avalada pol Ayuntamientu de Villaviciosa y cuyes actividaes ta previsto allugar en llocales ensin usu del Atenéu Obreru de La Villa. Magar que’l proyectu ta plantegáu hai yá tres años por responsables del Atenéu, onde llegó a cellebrase un cursu prácticu d’escanciáu como actividá aisllada, el sofitu municipal da-y agora nuevu puxu a la iniciativa y busca yá financiación pa reconvertir los llocales onde va allugase la futura escuela. Nesti sen, los inspiradores del proyectu calculen que sedrán necesarios unos 48.000 euros pa facer les obres pertinentes, y l’Ayuntamientu estudia la posible inyección de fondos europeos del programa Proder II, que busca la modernización y dinamización económica de les comarques rurales de la Unión Europea. El collectivu nel que la escuela d’escanciadores pondrá los sos güeyos a la hora de buscar alumnos sedrá la mocedá en paru. P’algamar una cualificación con valor oficial, los responsables de la futura escuela estudien implicar a la Escuela d’Hostelería del Principáu d’Asturies na formación teórica de los alumnos y na xestión del centru. 10 d'agostu, 2004 0 FacebookTwitterPinterestEmail