Los productores de Tierra de Cangas saquen al mercáu más de 150.000 llitros de vinu

El vinu de Cangas del Narcea realcuéntrase col mercáu. Los productores integraos na marca distintiva Vinos de la Tierra de Cangas ultimen los sos llabores pa sacar a la venta más de 150.000 llitros de vinu ellaboráu nel conceyu del suroccidente, depués d’una collecha que l’añu pasáu llevó a les bodegues un total de 150 tonelaes d’uves.

Según los datos apurríos na so edición de güei pol diariu El Comercio, la producción que sacarán al mercáu les bodegues asociaes a la Indicación Xeográfica Protexida Vinos de la Tierra de Cangas va suponer aprosimadamente la mitá de tol vinu d’esi conceyu qu’aportará esti añu a los consumidores, yá que’l restu de producción orixínenla ellaboradores artesanos ayenos a la marca distintiva.

Productores, llagareros y hosteleros del conceyu asturianu vinícola por escelencia axuntáronse l’añu pasáu a un proyectu européu que quier da-yos puxu a los vinos más desconocíos d’España, Francia y Portugal, col envís declaráu de saca-y partíu turísticu a la promoción de la cultura vinícola y baxo la denominación de ‘Rutes inédites del vinu nel Sudoeste d’Europa’.

Amás del principal conceyu productor de vinu n’Asturies, formen parte del proyectu les rexones franceses d’Aquitania, Midi-Pyrénées y Languedoc-Roussillion; zones del centru y norte de Portugal, como Coimbra y Vale do Ave; y territorios vinícoles de Baleares, Cantabria y Canarias.

Toos ellos busquen axuntar esfuerzos pa facer un vinu meyor y más rentable, dientro d’un plan ampliu qu’afita como horizonte de trabayu los prósimos dos años y prevé la esplotación turística de llagares y otros elementos del patrimoniu etnográficu, la edición de cartafueyos p’atrayer a visitantes y la cellebración de conferencies especializaes.