Villaviciosa plantega una escuela d’escanciadores pa propiciar l’accesu de paraos a la hostelería

‘Producir’ bonos escanciadores pa meyorar l’accesu de la mocedá a un puestu de trabayu na hostelería. Con esi envís echará a andar a partir del añu prósimu una escuela d’escanciáu avalada pol Ayuntamientu de Villaviciosa y cuyes actividaes ta previsto allugar en llocales ensin usu del Atenéu Obreru de La Villa.

Magar que’l proyectu ta plantegáu hai yá tres años por responsables del Atenéu, onde llegó a cellebrase un cursu prácticu d’escanciáu como actividá aisllada, el sofitu municipal da-y agora nuevu puxu a la iniciativa y busca yá financiación pa reconvertir los llocales onde va allugase la futura escuela.

Nesti sen, los inspiradores del proyectu calculen que sedrán necesarios unos 48.000 euros pa facer les obres pertinentes, y l’Ayuntamientu estudia la posible inyección de fondos europeos del programa Proder II, que busca la modernización y dinamización económica de les comarques rurales de la Unión Europea.

El collectivu nel que la escuela d’escanciadores pondrá los sos güeyos a la hora de buscar alumnos sedrá la mocedá en paru. P’algamar una cualificación con valor oficial, los responsables de la futura escuela estudien implicar a la Escuela d’Hostelería del Principáu d’Asturies na formación teórica de los alumnos y na xestión del centru.