La Xunta pola Defensa de la Llingua Asturiana llama a la manifestación pola oficialidá d’esti vienres

La Xunta pola Defensa de la Llingua Asturiana (XDLA), entidá que convocó la manifestación del sábadu 21 d’abril onde participaron 30.000 persones, llama otra vuelta a la sociedá asturiana a movilizase pola oficialidá del asturianu y del gallego-asturianu.

Asina, esti vienres 4 de mayu, a les 19.30 hores, va salir de la Estación del Norte d’Uviéu la tradicional manifestación pola oficialidá del Día de les Lletres Asturianes, que va acabar énte’l Teatru Campoamor, onde se va facer l’actu institucional de l’Academia de la Llingua Asturiana.

La Xunta pola Defensa de la Llingua Asturiana quier recordar que ye una organización con más de 30 años d’historia -fundóse en 1984- y que dende 1987 vien convocando esta movilización que, dende aquella, contó col apoyu de miles de persones.

Por eso, la organización fai “un llamáu a tolos asturianos y a toles asturianes pa que, como vienen faciendo dende hai 32 años, muestren el so apoyu a la igualdá de derechos llingüísticos ente tolos asturianos y a un futuru dignu pal nuestru patrimoniu llingüísticu”.