La XPDLA critica al Presidente de la Xunta Xeneral del Principáu

Nuna nota de prensa asoleyada ayeri, la XPDLA critica al Presidente de la Xunta Xeneral del Principáu por facer campaña electoral y desprestixar los derechos llingüísticos de los asturianos nun actu institucional que tenía de ser neutru: “Ayeri hubo un actu institucional na Xunta Xeneral del Principáu d’Asturies dientro del programa de la Selmana de les Lletres Asturianes y el presidente de la Xunta Xeneral, el socialista Pedro Sanjurjo, nun pudo evitalo y tuvo qu’aprovechar pa facer unes declaraciones pa dexar claru l’apoyu a la llinia del so partíu en cuantes a la cuestión llingüística: promoción del asturianu, pero ensin reconocimientu de derechos llegales”.

“Toi en contra de la oficialidá porque les llingües nun tienen que ser pa imponer o confrontar”, vieno a dicir. Nun saben na XPDLA “si tenía mieu a que lu confundieren con un bablista peligrosu por acoyer la llectura d’unos testos lliterarios y por eso quixo dexar claro qu’él ye de los que tán en contra. Lo que nos llama l’atención ye esa declaración y güei precisamente. Paeznos impropio del so papel institucional, de mano ecuánime y imparcial, que se dedique a facer política partidaria”.

Na XPDLA dicen nun saber tampoco “si concibe la promoción del asturianu namás p’actos simbólicos y lliterarios un día o una selmana al añu, pero si tanto-y gusta que nun haya imposiciones nin confrontaciones tendría que saber de sobra qu’eso consíguese con midíes llexislatives que garanticen que naide imponga nada a naide, non dexando les coses como tán. Güei, n’Asturies, la única imposición qu’hai ye la del usu del castellanu a tolos efectos llegales porque l’asturianu nun ye oficial. Polo tanto, la confrontación búscala quien s’empeña en negar derechos en cuenta de favorecelos”.

La nota de prensa diz tamién que “el señor Sanjurjo, igual que’l partíu del Gobiernu, nun s’entera. O, más bien, nun quier enterase y piensa que somos fatos, pero somos munchos los que queremos derechos llegales, quier dicise, la oficialidá. Y eso nun s’arregla con una Selmana na que nun creen y na que participen tapando les narices, pa cubrir l’espediente y esperar al añu que vien”.