La XDLA noma de llamentables los caberos años del Gobiernu del PSOE pal futuru de la Llingua Asturiana

Nuna nota de prensa asoleyada esti viernes primeru de xunu, la Xunta pola Defensa de la Llingua diz poner “puntu final a unos años llamentables del Gobiernu del PSOE pal futuru de la llingua asturiana”, depués de qu’acabaren “trés años d’una de les llexislatures más demoledores de la política institucional del PSOE d’Asturies pa col asturianu” nel que la XDLA fala ensin torgues d’un retrocesu claru.

Un retrocesu claru, “non solo na visibilización y espardimientu de la llingua sinón, mesmamente, n’ámbitos que, como l’educativu, el mediáticu y el de la toponimia, taben na marxinación y precariedá permanente y qu’agora, depués d’años de desidia malintencionada y incompetencia proverbial, tán peor: nun tris de que’l asturianu desapareza d’ellos”.

Sigún la nota asoleyada pola XDLA, “de lo poco que se facía, menos y peor. Esti ye’l balance de los últimos años en tolos aspectos. Inclusive dalgunes de les poques actividaes consolidaes fueron a menos o dexaron d’esistir… Nun fai falta más que mirar el llamentable espectáculu d’esti cursu postreru, onde l’Axenda Didáctica Escolar y el Premiu al Meyor Cantar foron posponiéndose de manera llastimosa hasta llegar al ridículu de que puedan convocase depués de que marchen (eso esperamos) tolos cargos a deu de la Conseyería, la Viceconseyería y la Dirección Xeneral de Política Llingüística”. Pa rematar, “l’equipu en funciones de la Conseyería d’Educación y Cultura presenta estos díes la versión nueva de la web Educastur, onde nun s’atopa nenguna sección dedicada a la llingua asturiana y el gallego-asturianu y onde (nun ye nenguna novedá nesti Gobiernu) sigue ensin respetase la toponimia oficial qu’ellos mesmos aprobaron nel BOPA, pero qu’incumplen a sabiendes”.

Pa la XDLA “esto nun pue siguir asina, nun vamos consentir que siga asina. Que se siga pasu a pasu l’axenda oculta de la clas dirixente que nes últimes décades vien faciendo tolo posible por facer desaparecer la llingua asturiana como vehículu de comunicación contemporaneu y dexala reducida a una curiosidá de muséu. Vamos denunciar constantemente a los culpables y instigadores d’esti procesu, y vamos señalar ensin duldar a los enemigos d’un futuru dignu y con derechos pa les persones que falen asturianu”.

La XDLA atalanta que nestos díes “coles negociaciones pa configurar el Gobiernu nuevu d’Asturies, los partíos con representación na Xunta Xeneral y comprometíos colos derechos de les persones falantes d’asturianu y cola cooficialidá van tener una oportunidá perfecta pa demostrar esi compromisu faciendo valir nos sos pactos, aliances y esixencies, de manera inescusable y irrenunciable, el respetu a la igualdá de la ciudadanía que la oficialidá supón. Tola xente, sobre manera, lo que nagua pola resolución d’esta llarga deficiencia democrática, va tar pendiente y tomar nota de lo que se dixo y se diz, de lo que se llucha y se defende”.