La selectividá va ser del 5 al 7 de xunu

La selectividá va ser del 5 al 7 de xunu
14 febreru 13:13 2018 Imprimir

Yá hai feches oficiales pales prebes d’accesu a la Universidá n’Asturies. La convocatoria ordinaria de la nomada “selectividá” va ser del 5 al 7 de xunu, mentanto que la convocatoria estraordinaria de la EBAU va celebrase del 3 al 5 de xunetu.

La EBAU va celebrase esti añu n’Asturies los díes martes 5, miércoles 6 y xueves 7 de xunu ente que la convocatoria estraordinaria va tener llugar del martes 3 al xueves 5 de xunetu. Comunicábalo esti día’l Principáu depués d’apautar la programación cola Universidá d’Uviéu.

La nota d’accesu a la Universidá va llograse de la media aritmética de los cuatro exames obligaos: les trés materies troncales xenerales (Hestoria d’España, Llingua Española y Lliteratura y primer idioma estranxeru) y la troncal de modalidá (Llatín, Matemátiques o Arte, según l’itinerariu escoyíu). El mínimu para aprobar va ser un 4. La nota xeneral d’accesu a la Universidá va ser la media ponderada de la de la EBAU (con un pesu del 40%) y de Bachilleratu (60%), y siempres tien de ser siquier d’un 5. Como l’añu pasáu, para xubir nota (el tramu de 10 a 14 puntos) los alumnos que lu deseyen van poder esaminase de dos o más materies d’opción del bloque de les asignatures troncales de segundu, que la so calificación sirvirá-yos para alzar -nunca empiorar- la nota.

El Ministeriu d’Educación publicó apocayá nel BOE la orde que va regular esti cursu les característiques d’esta prueba. La orde, apautada coles autonomíes, dibuxa en términos xenerales una EBAU casi idéntica a la del cursu pasáu. Hai dellos cambeos. Por casu, amplíense les opciones y los exames voluntarios colos que xubir nota y afítense per primer vegada plazos para la validez nel tiempu de les resultancies llograes.

Asina, esti cursu autorizase a les universidaes a tener en cuenta nos sos procedimientos d’almisión les notes que los alumnos que lo deseyen saquen al esaminase d’una segunda llingua estranxera distinta de la que cursaren como primer llingua estranxera del bloque d’asignatures troncales. Sicasí, según comunicó ayeri la institución académica asturiana, “la calificación llograda nesta prueba nun va ser sopesada pola Universidá d’Uviéu nos sos procedimientos d’almisión”.

La comisión organizadora de la EBAU n’Asturies tamién decidió suprimir la esceición que dexaba matriculase nun grau a los estudiantes que llograron el títulu de bachiller nos cursos 2015-2016 y 2016-2017 y nun superaron la PAU. Arriendes d’ello, pa ellos «tamién va ser requisitu imprescindible la superación de la EBAU» pal accesu a la Universidá nel cursu 2018-2019.

Los alumnos van tener tamién la opción de presentase en socesives convocatories -tanto na estraordinaria de xunetu como nes de cursos posteriores- «p’ameyorar la calificación llograda en cualesquier de les pruebes», col matiz de que solo se tomará en considerancia notar si ye cimeru a l’anterior.

Otra novedá. Per primer vegada, la superación de la selectividá ordinaria y la nota van tener «validez indefinida». Pero les calificaciones llograes nes pruebes voluntaries p’ameyorar la nota de la EBAU solo van sirvir nos dos cursos siguientes a llograles. Dambos periodos de validez, el xeneral y el de la meyora de notes, serán-y aplicables non solo a los qu’aprueben anguaño sinón tamién a los alumnos que superaron les pruebes el cursu pasáu. El 13 de setiembre va empezar el cursu 2018-2019 na Universidá d’Uviéu.

  Categories: