Trabe presenta na Universidá l’Atles ETLEN

Trabe presenta esti xueves 15 de febreru nel Aula Escalonada del edificiu históricu de la Universidá d’Uviéu ETLEN, el primer atles llingüísticu d’una zona d’Asturies que quier ser la obra más completa sobre la realidá llingüística del gallego-asturianu, na zona Eo-Navia.

Esti xueves 15 de febreru nel Aula Escalonada del edificiu históricu de la Universidá d’Uviéu , Santiago García, rector de la Universidá d’Uviéu, va ser l’encargáu de facer la presentación oficial na sociedá académica  del primer atles llingüísticu d’una zona d’Asturies. En concreto la del gallego-asturianu, na zona occidental del Eo-Navia, onde s’atopa la frontera ente los dominios llingüísticos gallegoportugués y asturlleonés.

Trátase del Estudiu de la Transición Llingüística na Zona Eo-Navia, Asturies (ETLEN). Atles dialectográficucu–horiométricu–dialectométricu, ellaboráu pol Dr. Ramón d’Andrés, profesor titular de Filoloxía Asturiana na Universidá d’Uviéu y coordinador del Seminariu de Filoloxía Asturiana, xunto colos llingüistes Fernando Álvarez-Balbuena, Xosé Miguel Suárez y Miguel R. Monteavaro. Ramón d’Andrés va tar tamién na presentación, xunto a la directora d’Ediciones Trabe, Esther Prieto.

El llibru, frutu d’una investigación entamada nel añu 2000 y financiada pola Universidá d’Uviéu, la Conseyería d’Educación y Cultura y el Ministeriu d’Educación, Cultura y Deporte, ye la obra más completa sobre la realidá llingüística del Eo-Navia (gallego-asturianu). Nes sos 1.080 páxines, ofrez un total de 643 mapes a tou color; d’ellos, 531 son mapes dialectográficos y los 112 restantes mapes d’estadística xeollingüística, según dos novedosos procedimientos: la horiometría, ideada pol equipu de la Universidá d’Uviéu; y la dialectometría, d’acordies col métodu diseñáu na Universidá de Salzburgo (Austria). Cada mapa va acompañáu con una completísima información llingüística. Los datos colos que se xo l’atles ETLEN llográronse gracies a una rigorosa encuestación llingüística de la zona estudiada.